દેશમાં ડિજિટલ પેમેન્ટની ક્રાંતિ સર્જનાર યુનિફાઇડ પેમેન્ટ્સ ઇન્ટરફેસ (UPI) ના માળખામાં આગામી ૧૫ ઓક્ટોબરથી મોટો ફેરફાર થવા જઈ રહ્યો છે. ₹૨,૦૦૦ થી વધુ મૂલ્યના ચોક્કસ વેપારી વ્યવહારો માટે મર્ચન્ટ ડિસ્કાઉન્ટ રેટ  લાગુ કરવાની જાહેરાત કરવામાં આવી છે. આ અંગે રિઝર્વ બેંક ઓફ ઇન્ડિયા  ના ગવર્નર સંજય મલ્હોત્રાએ બુધવારે ધિરાણ નીતિની સમીક્ષા બાદ યોજાયેલી પત્રકાર પરિષદમાં સ્પષ્ટ કર્યું હતું કે આ મામલે નિર્ણય લેવાઈ ચૂક્યો છે અને આ સાધારણ ફીથી UPI ટ્રાન્ઝેક્શનના કુલ વોલ્યુમ પર કોઈ નોંધપાત્ર નકારાત્મક અસર નહીં પડે.

ગવર્નર સંજય મલ્હોત્રાએ જણાવ્યું હતું કે, "અત્યાર સુધીના આંકડા જોતાં વ્યવહારના વોલ્યુમમાં કોઈ ઘટાડો નોંધાયો નથી. મને વ્યક્તિગત રીતે વિશ્વાસ છે કે આ નાની ફીથી ડિજિટલ પેમેન્ટ્સની ઝડપ ધીમી નહીં પડે." ઉલ્લેખનીય છે કે, સરકારે ડિજિટલ પેમેન્ટ ઇકોસિસ્ટમ સાથે જોડાયેલી બેંકો, પેમેન્ટ સર્વિસ પ્રોવાઇડર્સ (PSPs) અને UPI એપ્લિકેશન પ્રોવાઇડર્સની લાંબા ગાળાની ટકાઉપણું જાળવવા માટે ઉચ્ચ-મૂલ્યના વેપારી વ્યવહારો પર શૂન્ય-MDR ની નીતિમાંથી બહાર આવવાનો નિર્ણય લીધો છે.

નવા શુલ્ક માળખા અનુસાર, ₹૨,૦૦૦ થી વધુના P2M વ્યવહારો પર ૦.૪% MDR લાગુ થશે. ₹૭૫,૦૦૦ કે તેથી વધુના મોટા વ્યવહારો માટે કેપિંગ લિમિટ પ્રતિ વ્યવહાર મહત્તમ ₹૩૦૦ રાખવામાં આવી છે. જોકે, સામાન્ય નાગરિકો માટે મહત્વના સમાચાર એ છે કે વ્યક્તિ-થી-વ્યક્તિ (P2P) ટ્રાન્સફર સેવાઓ સંપૂર્ણપણે મફત રહેશે. ઉપરાંત, ₹૨,૦૦૦ સુધીના વેપારી ચુકવણીઓ અને નાના વેપારીઓ માટે શૂન્ય-MDR જાળવી રાખવામાં આવ્યો છે, જેનાથી દેશના લગભગ ૯૬% P2M વ્યવહારો આ નવા ચાર્જથી મુક્ત રહેશે.

આ શુલ્ક ગ્રાહકોએ ચૂકવવાનો નથી પરંતુ વેપારીઓ પર લાગુ થશે. વેપારીઓ પણ આ બોજ ગ્રાહકો પર નાખી શકશે નહીં. વધુમાં, રેલવે, ટેલિકોમ, વીમા અને ઇંધણ જેવા નિશ્ચિત ક્ષેત્રોમાં ₹૨,૦૦૦ થી વધુના વ્યવહારો માટે માત્ર ₹૫ નો ફિક્સ MDR વસૂલવામાં આવશે, જ્યારે મ્યુચ્યુઅલ ફંડ અને સ્ટોકબ્રોકિંગ સંબંધિત ચુકવણીઓ માટે ૦.૦૨% નો અત્યંત નીચો દર નક્કી કરાયો છે.