બેંગલુરુ, તા. ૨૭: બેંગલુરુના કોરમંગલા વિસ્તારમાં શનિવારે સાંજે એક હાસ્ય કલાકાર માટે ડરામણો અનુભવ રહ્યો હતો. હૈદરાબાદના જાણીતા સ્ટેન્ડ-અપ કોમેડિયન શરત ઉદયના ચાલુ શોમાં ઘૂસીને કેટલાક લોકોએ હંગામો મચાવ્યો હતો. આ વિવાદ ડિસેમ્બર ૨૦૨૪માં કરવામાં આવેલા જોક્સને લઈને થયો હતો, જેમાં શરતે આંધ્રપ્રદેશના મુખ્યમંત્રી એન. ચંદ્રબાબુ નાયડુ અને તેમના પુત્ર નારા લોકેશ પર કટાક્ષ કર્યો હતો.
સ્ટેજ પર જ ધમકી અને માફીની માંગ
સાંજે ૭ વાગ્યે શો શરૂ થયાની ગણતરીની મિનિટોમાં જ ૧૨ જેટલા લોકોનું ટોળું અચાનક સ્ટેજ પાસે પહોંચી ગયું હતું. પોતાને TDP ના સમર્થકો ગણાવતા આ લોકોએ અભદ્ર ભાષાનો પ્રયોગ કર્યો અને શરત પાસે જાહેરમાં માફીની માંગ કરી. શરત ઉદયે સમજાવવાનો પ્રયાસ કર્યો હતો કે તેણે આ મુદ્દે ૨૦૨૪માં જ માફી માંગી લીધી હતી અને તેનો વીડિયો પણ સોશિયલ મીડિયા પર ઉપલબ્ધ છે, તેમ છતાં ટોળું શાંત થયું નહોતું.
સોશિયલ મીડિયા પર વાયરલ થયો વીડિયો
આ સમગ્ર ઘટનાના વીડિયો અત્યારે સોશિયલ મીડિયા પર વાયરલ થઈ રહ્યા છે. વીડિયોમાં જોઈ શકાય છે કે સ્થિતિ ગંભીર બનતા શોને અધવચ્ચે જ અટકાવવો પડ્યો હતો. સ્થળ પર હાજર પ્રેક્ષકોમાં પણ ડરનો માહોલ ફેલાયો હતો. વેન્યુ મેનેજમેન્ટે પોલીસને જાણ કરી હતી, પરંતુ પોલીસ પહોંચે તે પહેલા જ હંગામો કરનાર લોકો ત્યાંથી ફરાર થઈ ગયા હતા.
કોણ છે શરત ઉદય?
શરત ઉદય છેલ્લા ૭ વર્ષથી કોમેડી સર્કિટમાં સક્રિય છે. તે ખાસ કરીને તેલુગુ સંસ્કૃતિ, રોજિંદા જીવન અને સામાજિક વિષયો પર તેના કટાક્ષ માટે જાણીતો છે. તે લોકપ્રિય તેલુગુ કોમેડી શો 'લાઈટ તીસ્કો' (Lite Teesko) નો હોસ્ટ પણ રહી ચૂક્યો છે. શરતે બાદમાં સ્પષ્ટતા કરી હતી કે તે કોઈ એક પક્ષના વિરોધમાં નથી, પરંતુ દરેક પક્ષો પર રમૂજ કરવી એ તેની કલાનો ભાગ છે.
અભિવ્યક્તિની આઝાદી પર ઉઠ્યા સવાલ
આ ઘટના બાદ કોમેડી જગતમાં ભારે આક્રોશ જોવા મળી રહ્યો છે. કલાકારોનું કહેવું છે કે જો વર્ષો જૂના જોક્સ પર આ રીતે હુમલા કે ધમકીઓ મળતી રહેશે, તો અભિવ્યક્તિની આઝાદી જોખમમાં મુકાઈ જશે. બેંગલુરુ પોલીસે અત્યારે આ મામલે તપાસ શરૂ કરી છે અને વેન્યુના સીસીટીવી ફૂટેજની તપાસ કરવામાં આવી રહી છે.