મુઝફ્ફરાબાદ: પાકિસ્તાન કબજા હેઠળના કાશ્મીર  માં દાયકાઓથી ચાલી રહેલા શોષણ અને અન્યાય સામે જનઆક્રોશનો જ્વાળામુખી ફાટ્યો છે. સંયુક્ત આવામી કાર્યવાહી સમિતિ  દ્વારા જાહેર કરાયેલી નિર્ણાયક 'લોંગ માર્ચ' પૂર્વે સમગ્ર પ્રદેશ છાવણીમાં ફેરવાઈ ગયો છે. સ્થાનિક વહીવટીતંત્રે રાવલકોટ સહિતના મુખ્ય શહેરોને સંપૂર્ણપણે સીલ કરીને 4,000 થી વધુ પેરામિલીટરી રેન્જર્સ, પોલીસ અને ફ્રન્ટિયર કોર્પ્સના સશસ્ત્ર જવાનોને રસ્તાઓ પર ઉતારી દીધા છે. આ આંદોલનને તાજેતરના વર્ષોમાં પાકિસ્તાન સરકાર વિરુદ્ધનો સૌથી મોટો વિદ્રોહ માનવામાં આવી રહ્યો છે. પ્રશાસન અને પ્રદર્શનકારીઓ વચ્ચે થયેલી લોહિયાળ અથડામણોમાં બે સુરક્ષાકર્મીઓ સહિત 12 લોકોના મોત નીપજતાં પરિસ્થિતિ નિયંત્રણ બહાર ગઈ છે.

આ હિંસા પાછળ સરકારી તંત્ર અને આંદોલનકારીઓ એકબીજા પર ગંભીર આરોપો લગાવી રહ્યા છે. પાકિસ્તાની સત્તાવાળાઓનો દાવો છે કે સંગઠન પર પ્રતિબંધ લાદવામાં આવ્યા બાદ ઉશ્કેરાયેલા હથિયારધારી કાર્યકરોએ સેના અને પોલીસ પર અંધાધૂંધ ફાયરિંગ કર્યું હતું, જેમાં બે પોલીસ જવાનો શહીદ થયા છે. બીજી તરફ, JAAC ના નેતાઓએ આ આક્ષેપોને સખત શબ્દોમાં નકારી કાઢ્યા છે. તેમનું કહેવું છે કે આંદોલનને આતંકવાદનું નામ આપીને બદનામ કરવા માટે સરકારે જ સાદા કપડામાં સશસ્ત્ર ગુંડાઓ મેદાનમાં ઉતાર્યા છે. સ્વતંત્ર અહેવાલો અને સત્ય બહાર ન આવે તે માટે રાવલકોટ અને આસપાસના વિસ્તારોમાં કોઈપણ આગોતરી સૂચના આપ્યા વિના સંપૂર્ણ મીડિયા બ્લેકઆઉટ લાગુ કરી દેવામાં આવ્યો છે અને આંતરરાષ્ટ્રીય પત્રકારોના પ્રવેશ પર પણ સખત પ્રતિબંધ લગાવી દેવાયો છે.

આ આંદોલનની શરૂઆત વિધાનસભામાં બહારના લોકો માટે અનામત બેઠકોના વિરોધથી થઈ હતી, પરંતુ હવે તે પાકિસ્તાનની હાઇબ્રિડ સરકાર સામે એક મોટું આર્થિક અને સામાજિક યુદ્ધ બની ચૂક્યું છે. સમિતિએ પોતાના 38-મુદ્દાના માગણી પત્રમાં સરકારી બાબુઓના વિશેષાધિકારો નાબૂદ કરવા, કુદરતી સંસાધનો પર સ્થાનિક પ્રજાનો હક આપવા, આરોગ્ય-શિક્ષણ સુધારવા અને લઘુત્તમ માસિક પગાર 50,000 રૂપિયા કરવાની માગ કરી છે. છેલ્લા કેટલાક અઠવાડિયાથી સરકારે ખોરાક, લોટ અને દવાઓનો પુરવઠો રોકી દેતાં પીઓકેમાં ભયંકર માનવતાવાદી કટોકટી સર્જાઈ છે. પરિણામે, આંદોલનના મુખ્ય નેતા સરદાર અમાન ખાને ભારત પાસે માનવતાના ધોરણે મદદની અપીલ કરી છે અને આ કૂચને લાઇન ઓફ કંટ્રોલ (LoC) તરફ વાળવા અંગે સમર્થકોનો અભિપ્રાય માગ્યો છે, જેને પગલે ભારતીય સેના પણ સરહદ પર એલર્ટ થઈ ગઈ છે.