નવી દિલ્હી : અમેરિકી કોર્ટ દ્વારા શીખ અલગતાવાદી ગુરપતવંત સિંહ પન્નુને રાષ્ટ્રીય સુરક્ષા સલાહકાર અજીત ડોભાલ અને રિસર્ચ એન્ડ એનાલિસિસ વિંગ (RAW) ના પૂર્વ વડા સામંત ગોયલ વિરુદ્ધ ભારતીય અદાલતો મારફતે સમન્સ બજાવવાની મંજૂરી આપવામાં આવતા મોટો વિવાદ સર્જાયો છે.

પ્રાપ્ત વિગતો અનુસાર, ન્યૂયોર્કની કોર્ટે ૩૦ નવેમ્બર, ૨૦૨૬ સુધીની સમયમર્યાદા નક્કી કરીને પન્નુને કાનૂની દસ્તાવેજો પહોંચાડવાની પરવાનગી આપી છે, જેના જવાબમાં ભારતે કડક પ્રતિક્રિયા આપીને આ તમામ આરોપોને પાયાવિહોણા ગણાવ્યા છે.

વિદેશ મંત્રાલયના પ્રવક્તા રણધીર જયસ્વાલે એક નિવેદનમાં સ્પષ્ટ કર્યું છે કે ભારતે તેના શીર્ષ અધિકારીઓ સામેના આ બનાવટી અને દૂષિત હુમલાઓને સંપૂર્ણપણે નકારી કાઢ્યા છે અને આવા તુચ્છ મુકદ્દમાઓને કોઈ સ્થાન નથી.

ભારત સરકાર દ્વારા સ્પષ્ટ કરવામાં આવ્યું છે કે ભારતમાં ન્યાયિક દસ્તાવેજો બજાવવાની કોઈપણ પ્રક્રિયા કે વિનંતી માત્ર ભારતની અધિકૃત કેન્દ્રીય સત્તા એટલે કે 'કાયદા અને ન્યાય મંત્રાલય' ના માર્ગ દ્વારા જ થઈ શકે છે.

અમેરિકા સ્થિત અલગતાવાદી સંગઠન સાથે સંકળાયેલા અને ભારત દ્વારા આતંકવાદી જાહેર કરાયેલા પન્નુના આ કેસને લઈને બંને દેશોના કૂટનામિક સંબંધો અને કાનૂની પ્રક્રિયાઓ પર તેની શું અસર પડશે તે અંગે વિશ્લેષકો દ્વારા નજર રાખવામાં આવી રહી છે.

આગામી સમયમાં આ મામલે ભારતીય પક્ષ તરફથી કાનૂની સ્તરે કેવા કડક પગલાં લેવામાં આવે છે અને અમેરિકી અદાલતના આદેશ સામે કઈ રણનીતિ અપનાવવામાં આવે છે તે જોવું મહત્વપૂર્ણ રહેશે.