ન્યૂયોર્ક: અમેરિકાના રાષ્ટ્રપતિ ડોનાલ્ડ ટ્રમ્પ ઈરાન સાથેની મંત્રણા અટકી પડતા અત્યંત નિરાશ છે અને ફરીથી મોટા હુમલાઓ શરૂ કરવાનું વિચારી રહ્યા છે. અમેરિકન વહીવટીતંત્રને પાકિસ્તાનની મધ્યસ્થી પર ભારે શંકા છે, જ્યારે ઇઝરાયેલ ઈરાનના નેતૃત્વને સીધો અવરોધ માને છે. બીજી તરફ સેનેટર ચક શૂમરે ટ્રમ્પની નીતિઓની આકરી ટીકા કરી સૈન્ય પાછું ખેંચવા દબાણ વધાર્યું છે.

અમેરિકા અને ઈરાન વચ્ચે લાંબા સમયથી ચાલી રહેલી શાંતિ મંત્રણાઓ હવે પૂર્ણ નિષ્ફળતા તરફ આગળ વધી રહી છે. સીએનએન અને અન્ય સત્તાવાર અહેવાલો મુજબ, રાષ્ટ્રપતિ ડોનાલ્ડ ટ્રમ્પ ઈરાનના વલણથી ભારે નારાજ છે. તેઓ છેલ્લા કેટલાક સપ્તાહોની સરખામણીમાં હવે ઈરાન પર ફરીથી મોટા પાયે લશ્કરી હુમલાઓ શરૂ કરવા અંગે ખૂબ જ ગંભીરતાથી વિચારી રહ્યા છે. ખાસ કરીને હોર્મુઝની સામુદ્રધુની સતત બંધ હોવાને કારણે અને ઈરાની નેતૃત્વમાં જોવા મળતા આંતરિક મતભેદોને કારણે ટ્રમ્પની ધીરજ ખૂટી રહી છે. વ્હાઇટ હાઉસના કેટલાક અધિકારીઓ ઈરાનને નબળું પાડવા માટે લક્ષ્યાંકિત હુમલા કરવાની તરફેણમાં છે, જ્યારે અમુક લોકો કૂટનીતિ ચાલુ રાખવા માંગે છે.

આ સમગ્ર મંત્રણામાં પાકિસ્તાન મધ્યસ્થી તરીકે ભૂમિકા ભજવી રહ્યું છે, પરંતુ ટ્રમ્પના સાથીઓને તેમની કામગીરી પર પ્રબળ શંકા છે. અમેરિકન અધિકારીઓનું માનવું છે કે પાકિસ્તાન ઈરાન સમક્ષ અમેરિકાની નારાજગી કડકાઈથી રજૂ કરી રહ્યું નથી અને અમેરિકાને ઈરાનની સ્થિતિ અંગે વાસ્તવિકતા કરતા વધુ પડતું સકારાત્મક ચિત્ર બતાવી રહ્યું છે.

ઇઝરાયેલી ડિજિટલ પ્લેટફોર્મ "વાલ્લા"ના અહેવાલ મુજબ, ઇઝરાયેલના સંરક્ષણ વિભાગનું સ્પષ્ટ માનવું છે કે ઈરાનના સુપ્રીમ લીડર મોજતબા ખામેનેઈ આ મંત્રણામાં સૌથી મોટો અવરોધ છે. 

ઇઝરાયેલના વરિષ્ઠ સૈન્ય અધિકારીઓ બંધબારણે થતી ચર્ચાઓમાં ઈરાનના રાષ્ટ્રીય માળખા પર વ્યૂહાત્મક હુમલાઓ કરવાનું આકરૂં સૂચન કરી રહ્યા છે. ગયા સપ્તાહે જ અમેરિકા હુમલો કરવાની તૈયારીમાં હતું, પરંતુ ટ્રમ્પની મંત્રણા ટીમના વરિષ્ઠ સભ્ય દ્વારા થયેલ છેલ્લી ઘડીની રજૂઆત બાદ મંત્રણાના અંતિમ પ્રયાસ માટે તેને થોડા સમય માટે મુલતવી રાખવામાં આવ્યો હતો.

આંતરરાષ્ટ્રીય તણાવ વચ્ચે અમેરિકાના આંતરિક રાજકારણમાં પણ ભારે ગરમાવો આવ્યો છે. સેનેટ માઈનોરિટી લીડર ચક શૂમરે એક્સ મીડિયા પ્લેટફોર્મ પર પોસ્ટ કરીને રાષ્ટ્રપતિ પર આકરા પ્રહારો કર્યા છે. તેમણે આ સંઘર્ષને ગેરકાયદેસર અને અત્યંત ખર્ચાળ ગણાવીને કહ્યું છે કે ટ્રમ્પ અમેરિકાને એક વિનાશક યુદ્ધમાં ખેંચી ગયા છે, જેને તેઓ માત્ર મીની વોર કહી રહ્યા છે. 

ડેમોક્રેટ્સ આ સપ્તાહે અમેરિકન સૈનિકોને પાછા ખેંચવા માટે સાતમી વખત મતદાન કરાવવાની તૈયારી કરી રહ્યા છે અને તેમણે ચેતવણી આપી છે કે જો રિપબ્લિકન પાર્ટી આ પ્રસ્તાવની વિરુદ્ધમાં મત આપશે, તો તેઓ પણ આ યુદ્ધ માટે સંપૂર્ણપણે જવાબદાર ગણાશે.