નવી દિલ્હી : આગામી ૩ નવેમ્બર, ૨૦૨૬ના રોજ યોજાનારી અમેરિકાની મધ્ય-ગાળાની (Midterm) સામાન્ય ચૂંટણીઓને હવે ગણતરીના દિવસો બાકી રહ્યા છે. ૨૦૨૮ની પ્રમુખપદની ચૂંટણી પહેલાં આ ચૂંટણી રાષ્ટ્રપતિ ડોનાલ્ડ ટ્રમ્પ અને તેમની રિપબ્લિકન પાર્ટી માટે લિટમસ ટેસ્ટ સમાન સાબિત થશે. બીજા કાર્યકાળમાં ઈરાન સાથેના યુદ્ધ, વધતી મોંઘવારી અને ઈંધણના ભડકે બળતા ભાવને કારણે ટ્રમ્પનું 'અપ્રૂવલ રેટિંગ' ઘટીને ૩૨% ની ઐતિહાસિક નીચલી સપાટીએ પહોંચી ગયું છે.

વૈશ્વિક પ્રિડિક્શન બજારો (Prediction Markets) જેમ કે 'પોલીમાર્કેટ' (Polymarket) અને 'કાલશી' (Kalshi) ના તાજેતરના ડેટા દર્શાવે છે કે સંસદના નીચલા ગૃહ 'યુએસ હાઉસ ઓફ રિપ્રેઝન્ટેટિવ્સ' (House) માં ડેમોક્રેટિક પાર્ટી બહુમતી મેળવવાની રેસમાં ખૂબ આગળ ચાલી રહી છે. કાલશી પર ડેમોક્રેટ્સની જીતની શક્યતા ૯૧.૬% અને પોલીમાર્કેટ પર ૯૩% જેટલી જોવા મળી રહી છે. જ્યારે યુએસ સેનેટ પર નિયંત્રણ મેળવવા માટે પણ ડેમોક્રેટ્સ ૬૩% સંભાવના સાથે મજબૂત સ્થિતિમાં છે.

તમામ ૪૩૫ હાઉસ બેઠકો અને ૧૦૦ માંથી એક-તૃતિયાંશ સેનેટ બેઠકો માટે યોજાનારી આ ચૂંટણી અંગે સટ્ટાબજારમાં 'ડેમોક્રેટ્સ સ્વીપ' (ડેમોક્રેટ્સનો સંપૂર્ણ વિજય) પર ૬૧% જેટલો વિશ્વાસ વ્યક્ત કરાઈ રહ્યો છે. જો આ પરિણામો સાચા ઠરશે તો ટ્રમ્પના બાકીના બે વર્ષના કાર્યકાળ પર સંસદીય અંકુશ આવી જશે.