મુંબઈ, તા.20: અમેરિકાના વિદેશ મંત્રી માર્કો રૂબિયો મંગળવારે ભારતની ત્રણ દિવસીય મુલાકાતે દેશના આર્થિક પાટનગર મુંબઈ આવી પહોંચ્યા છે. આ પ્રવાસ દરમિયાન તેઓ ભારતના વિદેશ મંત્રી એસ. જયશંકર સાથે ઉચ્ચ સ્તરીય દ્વિપક્ષીય બેઠક યોજવાના છે, જેમાં ભારત-અમેરિકા વ્યૂહાત્મક ભાગીદારી, વ્યાપાર કરારો અને વૈશ્વિક મુદ્દાઓ પર વિસ્તૃત ચર્ચા કરવામાં આવશે. 

મુંબઈ એરપોર્ટ પર આગમન બાદ માર્કો રૂબિયોએ તેમના પ્રવાસની શરૂઆત કરતા 26/11ના મુંબઈ આતંકવાદી હુમલાના નિર્દોષ પીડિતોને શ્રદ્ધાંજલિ અર્પણ કરવા માટે તાજ મેમોરિયલ ખાતે પુષ્પાંજલિ અર્પણ કરી હતી. આ પ્રવાસમાં તેમની સાથે એક મોટો વેપારી પ્રતિનિધિમંડળ પણ જોડાયું છે, જે બંને દેશો વચ્ચે આર્થિક અને વેપારી સંબંધોને વધુ મજબૂત બનાવવા પર વિશેષ ભાર મૂકી રહ્યું છે. 

વિદેશ મંત્રી એસ. જયશંકર અને માર્કો રૂબિયો વચ્ચે યોજાનારી આ બેઠકમાં મુખ્યત્વે ભારત-અમેરિકા વચ્ચેના પેન્ડિંગ ટ્રેડ ડીલ, ઊર્જા સુરક્ષા અને ટેકનોલોજી ક્ષેત્રના સહયોગ અંગે મહત્વપૂર્ણ ચર્ચાઓ હાથ ધરવામાં આવશે. આ વર્ષે માર્કો રૂબિયોની આ બીજી ભારત મુલાકાત છે, જે બંને દેશો વચ્ચેના ગાઢ સંબંધો અને પરસ્પર સહયોગની પ્રતિબદ્ધતા દર્શાવે છે. 

મુંબઈની સત્તાવાર બેઠકો પૂર્ણ કર્યા બાદ માર્કો રૂબિયો ગુજરાતના જામનગર ખાતે સ્થિત વિશ્વના સૌથી મોટા રિફાઇનરી સંકુલની મુલાકાતે પણ જવાના છે. જામનગરની આ મુલાકાત ઊર્જા ક્ષેત્રે દ્વિપક્ષીય સહયોગને વેગ આપવા અને નવા રોકાણની સંભાવનાઓ તપાસવા માટે અત્યંત મહત્વપૂર્ણ માનવામાં આવી રહી છે. 

અમેરિકા અને ભારત વચ્ચે અગાઉ પણ વિવિધ વૈશ્વિક અને ક્ષેત્રીય મુદ્દાઓ પર ગાઢ સંકલન રહ્યું છે. આ ઉચ્ચસ્તરીય મુલાકાતથી બંને દેશોના વેપારી સંબંધોને નવી દિશા મળશે તથા આગામી સમયમાં આર્થિક અને રક્ષા ક્ષેત્રે નવા કરારો થવાની પૂરી સંભાવના વ્યક્ત કરવામાં આવી રહી છે.