મુંબઈ : અમેરિકાના વિદેશ સચિવ માર્કો રુબિયોએ પાકિસ્તાન સાથેના રાજદ્વારી સંબંધોને લઈને એક મોટું અને સ્પષ્ટ નિવેદન આપ્યું છે. ભારતની ત્રણ દિવસીય સત્તાવાર મુલાકાતે આવેલા માર્કો રુબિયોએ મુંબઈમાં મીડિયા સાથે વાતચીત કરતા જણાવ્યું હતું કે, પાકિસ્તાન પાસે પરમાણુ શસ્ત્રો હોવા અને તેના ભૌગોલિક સ્થાનને કારણે અમેરિકા માટે તેની સાથેના રાજદ્વારી સંબંધો સંપૂર્ણપણે તોડી નાખવા અશક્ય છે. તેમણે ઉમેર્યું કે પાકિસ્તાન સાથે સંબંધો જાળવી રાખવાનો અર્થ એ નથી કે અમેરિકા તેની આતંકવાદ તરફી નીતિઓનું સમર્થન કરે છે, પરંતુ આનાથી વોશિંગ્ટનને ભારતની ચિંતાઓ સીધી ઇસ્લામાબાદ સમક્ષ ઉઠાવવાની તક મળે છે.

વિદેશ સચિવ તરીકે પોતાની ભૂમિકા સ્પષ્ટ કરતા રુબિયોએ કહ્યું કે વૈશ્વિક વિદેશ નીતિનું સંચાલન કરતી વખતે ક્યારેક એવા દેશો સાથે પણ વાતચીત જાળવી રાખવી પડે છે જેની સાથે ગંભીર મતભેદો હોય. તેમણે આ વલણની સરખામણી ભારતના ઈરાન સાથેના સંબંધો સાથે કરતા જણાવ્યું કે દરેક દેશે પોતાના રાષ્ટ્રીય હિતોને ધ્યાનમાં રાખીને નીતિઓ ઘડવી પડે છે. અમેરિકા કોઈપણ જગ્યાએ આતંકવાદની વિરુદ્ધ છે અને પાકિસ્તાન સાથે વાતચીતનો ઉપયોગ ભારતની સુરક્ષા અને સરહદ પારની ઘૂસણખોરી જેવા મુદ્દાઓ પર દબાણ લાવવા માટે કરવામાં આવશે.

બીજી તરફ, આંતરરાષ્ટ્રીય સ્તરે ભારતે પણ પાકિસ્તાનને આડે હાથ લેતા કડક વલણ અપનાવ્યું છે. ઇરાકના બગદાદમાં તાજેતરમાં યોજાયેલી ઇસ્લામિક સહકાર સંગઠન (OIC) ની ૫૨મી બેઠકમાં જમ્મુ-કાશ્મીર અને લદ્દાખ અંગે પસાર કરવામાં આવેલા ભારત વિરોધી ઠરાવોને ભારતે સંપૂર્ણપણે નકારી કાઢ્યા છે. વિદેશ મંત્રાલયે સ્પષ્ટ કર્યું છે કે આ ટિપ્પણીઓ દુર્ભાવનાપૂર્ણ, પક્ષપાતી અને પાકિસ્તાન પ્રાયોજિત છે. ભારતે કડક શબ્દોમાં જણાવ્યું છે કે જમ્મુ અને કાશ્મીર ભારતના અભિન્ન અંગ છે અને OIC ને ભારતના આંતરિક મામલાઓમાં બોલવાનો કોઈ અધિકાર નથી.