તેલ અવીવ/તેહરાન/વોશિગ્‍ટન, ડીસી તા.૨૪: અમેરિકન સંસદના ઉપલા ગૃહ, સેનેટે ઈરાન યુદ્ધ વિરુદ્ધ ઠરાવ પસાર કર્યો છે. ૫૦-૪૮ મતથી મંજૂર થયેલા ઠરાવમાં યુએસ રાષ્ટ્રપતિ ડોનાલ્‍ડ ટ્રમ્‍પને ઈરાન વિરુદ્ધ લશ્‍કરી કાર્યવાહી રોકવાની હાકલ કરવામાં આવી છે. આ ઠરાવને અગાઉ પ્રતિનિધિ ગૃહમાં પણ મંજૂરી આપવામાં આવી હતી.

૧૯૭૩ના યુદ્ધ સત્તા અધિનિયમ પછી આ પહેલી વાર છે જ્‍યારે યુએસ કોંગ્રેસના બંને ગૃહોએ રાષ્ટ્રપતિ પાસેથી યુદ્ધ જેવી કાર્યવાહી બંધ કરવાની માંગ કરી છે. મતદાન દરમિયાન ચાર રિપબ્‍લિકન ધારાસભ્‍યો ડેમોક્રેટ્‍સ સાથે જોડાયા, જે ટ્રમ્‍પના પક્ષમાં વધતા બળવાને ઉજાગર કરે છે.

જોકે, વ્‍હાઇટ હાઉસે જણાવ્‍યું છે કે આ ઠરાવની કોઈ કાનૂની અસર થશે નહીં અને યુએસ લશ્‍કરી કાર્યવાહી પહેલાથી જ સમાપ્ત થઈ ગઈ છે.

આ દરમિયાન, યુએસ સેક્રેટરી ઓફ સ્‍ટેટ માર્કો રુબિયો યુએઈ, બહેરીન અને કુવૈતની મુલાકાતે છે. તેમનો ઉદ્દેશ્‍ય યુએસ-ઈરાન કરાર અંગે ગલ્‍ફ દેશોની ચિતાઓને દૂર કરવાનો છે. આ દેશોને ડર છે કે આ કરારથી હોર્મુઝ સ્‍ટ્રેટમાં ઈરાનનો પ્રભાવ વધી શકે છે. વધુમાં, ઈરાનના મિસાઈલ કાર્યક્રમ પર કરારમાં સ્‍પષ્ટ શરતોનો અભાવ પ્રશ્નો ઉભા કરી રહ્યો છે.

અમેરિકા અને ઈરાન વચ્‍ચે ચાલી રહેલી વાટાઘાટોમાં ઈરાનના પુનર્નિર્માણ માટે સંભવિત ઼૩૦૦ બિલિયન ફંડની પણ ચર્ચા થઈ રહી છે. એવું માનવામાં આવે છે કે આ સંદર્ભમાં ગલ્‍ફ દેશો પાસેથી નાણાકીય સહાય માંગવામાં આવી શકે છે. તેથી વોશિગ્‍ટન તેના સાથી દેશોનો ટેકો મેળવવાનો પ્રયાસ કરી રહ્યું છે.