ન્યૂયોર્ક: અમેરિકા અને વેનેઝુએલા વચ્ચેના વણસેલા સંબંધો અને મેનહટન ફેડરલ કોર્ટમાં ચાલી રહેલા હાઈ-વોલ્ટેજ ડ્રામામાં શુક્રવારે એક મહત્વનો વળાંક આવ્યો છે. લાંબા સમયના વિવાદ બાદ, યુએસ સરકારે આખરે સ્વીકાર્યું છે કે વેનેઝુએલાની સરકાર તેના પૂર્વ રાષ્ટ્રપતિ નિકોલસ માદુરો અને તેમની પત્ની સિલિયા ફ્લોરેસના બચાવ પક્ષના વકીલોનો કાનૂની ખર્ચ ચૂકવી શકે છે. અમેરિકી ટ્રેઝરી ડિપાર્ટમેન્ટે આ માટે સુધારેલા લાઇસન્સ જારી કર્યા છે, જે અત્યાર સુધી અટકેલા ભંડોળના માર્ગને મોકળો કરશે.

ઉલ્લેખનીય છે કે, અમેરિકન દળોએ આ વર્ષે જાન્યુઆરીમાં વેનેઝુએલાની રાજધાની કારાકાસમાં એક ગુપ્ત ઓપરેશન હાથ ધરીને માદુરોને પકડી લીધા હતા. તેમના પર 'નાર્કો-ટેરરિઝમ' (માદક દ્રવ્યો દ્વારા આતંકવાદ) અને કોકેઈનની દાણચોરી કરવાના ગંભીર કાવતરાના આરોપો મૂકવામાં આવ્યા છે. હાલમાં આ દંપતી બ્રુકલિનની અટકાયત સુવિધામાં કેદ છે અને તેમણે પોતાની જાતને નિર્દોષ જાહેર કરી છે.

ન્યાયાધીશના કડક વલણ બાદ સરકાર નમી:

આ સમગ્ર વિવાદ ત્યારે વકર્યો હતો જ્યારે અમેરિકાએ માદુરોના વકીલોને મળનારી ચૂકવણીઓને બ્લોક કરી દીધી હતી. કેસની સુનાવણી કરી રહેલા ન્યાયાધીશ એલ્વિન કે. હેલરસ્ટીને સરકારના આ તર્ક સામે સખત નારાજગી વ્યક્ત કરી હતી. તેમણે ચેતવણી આપી હતી કે જો આરોપીને યોગ્ય કાનૂની બચાવ માટે ભંડોળ નહીં મળે, તો તેઓ આખો કેસ રદ કરવાનું વિચારી શકે છે. ન્યાયાધીશના આ કડક વલણ અને બચાવ પક્ષના વકીલ બેરી જે. પોલેકની રજૂઆતો બાદ અમેરિકી વહીવટીતંત્રને નમતું જોખવું પડ્યું છે.

શું છે સમગ્ર આરોપ?

અમેરિકી એટર્ની જે ક્લેટનના જણાવ્યા અનુસાર, નિકોલસ માદુરો પર અમેરિકામાં મોટા પાયે નશીલા પદાર્થો ઘુસાડવા અને આંતરરાષ્ટ્રીય આતંકવાદી સંગઠનોને મદદ કરવાના આરોપો છે. જોકે, હવે વકીલોની ફીની ચૂકવણીનો રસ્તો સાફ થતા, બચાવ પક્ષે કેસ રદ કરવાની તેમની જૂની વિનંતી હાલ પૂરતી પાછી ખેંચી લીધી છે. આંતરરાષ્ટ્રીય સ્તરે આ કેસ પર સૌની નજર છે કારણ કે તે સીધી રીતે બે દેશોના રાજદ્વારી સંબંધો અને કાયદાકીય પ્રક્રિયા સાથે જોડાયેલો છે. આગામી દિવસોમાં ન્યૂયોર્કની આ કોર્ટમાં અનેક ચોંકાવનારા ખુલાસા થવાની શક્યતા છે.