નવી દિલ્‍હી તા.૧૮: જો તમે તમારા પરિવાર સાથે અમેરિકા જવાનું સપનું જોઈ રહ્યા છો અને બાળકોના વિઝાની અરજી કરવાની તૈયારી કરી રહ્યા છો, તો આ મહત્ત્વપૂર્ણ અપડેટ તમારા માટે છે. સામાન્‍ય રીતે ઘણા વાલીઓ એવું માનતા હોય છે કે નાના બાળકો કે શિશુઓને વિઝા ઇન્‍ટરવ્‍યૂમાં લઈ જવાની જરૂર હોતી નથી, પરંતુ યુએસ એમ્‍બેસીએ આ માન્‍યતા અંગે અત્‍યંત મહત્ત્વપૂર્ણ સ્‍પષ્ટતા કરી છે. હવે ઉંમર ભલે ગમે તે હોય, દરેક સગીર અરજદારે ઇન્‍ટરવ્‍યૂમાં રૂબરૂ હાજર રહેવું અનિવાર્ય રહેશે.

ભારત ખાતેની યુએસ એમ્‍બેસીએ સોશિયલ મીડિયા પ્‍લેટફોર્મ X પર પોતાના વિઝા ફ્રાઈડે (Visa Friday) વીડિયો સેશન દ્વારા આ અંગે સ્‍પષ્ટ નિર્દેશ જાહેર કર્યો છે.

નવજાત શિશુથી લઈને ૧૭ વર્ષની વય સુધીના તમામ સગીર (Minor) અરજદારોએ કોન્‍સ્‍યુલર ઇન્‍ટરવ્‍યૂ માટે રૂબરૂ હાજર રહેવું પડશે.

માતા-પિતા કે વાલી પોતાના બાળક વતી એકલા એપોઇન્‍ટમેન્‍ટમાં હાજર રહી શકશે નહીં.

કોઈપણ ચોક્કસ વયજૂથ માટે રૂબરૂ હાજરીમાંથી છૂટછાટ આપવામાં આવી નથી.

અત્‍યાર સુધી સામાન્‍ય રીતે ૧૪ વર્ષથી ઓછી ઉંમરના બાળકો માટે ઇન્‍ટરવ્‍યૂ માફીની જોગવાઈ ઉપલબ્‍ધ હતી. ખાસ કરીને જે માતા-પિતા બંને પાસે પહેલેથી જ માન્‍ય યુએસ વિઝા હોય તેમના બાળકોના માત્ર દસ્‍તાવેજો સબમિટ કરીને વિઝા મેળવી શકતા હતા.

યુએસ એમ્‍બેસીના અધિકારીઓએ જણાવ્‍યૂં છે કે વિઝા પ્રક્રિયામાં કોન્‍સ્‍યુલર ઇન્‍ટરવ્‍યૂ એ અત્‍યંત સંવેદનશીલ અને પાયાનો ભાગ છે.

રાષ્ટ્રીય અને સરહદી સુરક્ષાઃ અધિકારીઓ દ્વારા દરેક અરજદારનું પ્રત્‍યક્ષ મૂલ્‍યાંકન કરવું એ સરહદ સુરક્ષા, રાષ્ટ્રીય સુરક્ષા અને જાહેર સલામતી જાળવવાના વૈશ્વિક ધોરણોનો એક ભાગ છે.

ઓળખની ખાતરીઃ કોન્‍સ્‍યુલર અધિકારીઓ દરેક અરજદારને રૂબરૂ મળીને ઓળખ અને યોગ્‍યતાની સચોટ ચકાસણી કરે છે.

જો તમે તમારા બાળક માટે અમેરિકન વિઝાની અરજી કરી રહ્યા છો અથવા આગામી દિવસોમાં આયોજન કરી રહ્યા છો, તો નીચેની બાબતોનું ધ્‍યાન રાખવું.

ઇન્‍ટરવ્‍યૂની તારીખ અને સમય નક્કી કરતી વખતે બાળક તમારી સાથે ઉપસ્‍થિત રહી શકે તે રીતે આયોજન કરો.

બાળકના તમામ જરૂરી દસ્‍તાવેજો (જેમ કે જન્‍મ પ્રમાણપત્ર, પાસપોર્ટ, DS-૧૬૦ કન્‍ફર્મેશન પેજ વગેરે) સાથે રાખવાની સંપૂર્ણ તૈયારી રાખો.

વિઝા પ્રક્રિયામાં કોઈપણ પ્રકારની અડચણ કે વિલંબથી બચવા માટે યુએસ એમ્‍બેસીના આ નિયમનું પાલન કરવું હવેથી દરેક ભારતીય વાલી માટે અનિવાર્ય રહેશે.