મુંબઈ, તા.30: ભારતના દિગ્ગજ માઇનિંગ અને મેટલ ગ્રૂપ વેદાંત લિમિટેડ (Vedanta Limited) એ શેરબજાર બંધ થવાની થોડી મિનિટો પહેલાં એક ખૂબ જ મહત્વપૂર્ણ અને મોટી જાહેરાત કરી છે. અનિલ અગ્રવાલની આગેવાની હેઠળની આ કંપનીએ પોતાના રિયલ એસ્ટેટ બિઝનેસને અલગ કરીને એક સ્વતંત્ર લિસ્ટેડ કંપની બનાવવા માટેના ડિમર્જર (Demerger) ની સત્તાવાર યોજના જાહેર કરી છે. આ સમાચાર આવતાં જ માર્કેટમાં રોકાણકારો વચ્ચે ભારે ઉત્સાહ જોવા મળ્યો હતો.
આ ડિમર્જર યોજના હેઠળ વેદાંત લિમિટેડના હાલના તમામ શેરધારકોને નવી રિયલ એસ્ટેટ કંપનીમાં હિસ્સેદારી આપવામાં આવશે. કંપની દ્વારા નક્કી કરાયેલી જોગવાઈ મુજબ, રોકાણકારો પાસે રહેલા વેદાંતના દરેક 20 શેર સામે નવી રિયલ એસ્ટેટ કંપનીનો 1 શેર બિલકુલ ફ્રીમાં આપવામાં આવશે. જોકે, આ માટેની ચોક્કસ રેકોર્ડ ડેટ (Record Date) આગામી દિવસોમાં જાહેર કરવામાં આવશે. વેદાંતનો રિયલ એસ્ટેટ બિઝનેસ રહેણાંક, વાણિજ્યિક, હોટેલ ડેવલપમેન્ટ તેમજ આઈટી અને ઇન્ડસ્ટ્રિયલ પાર્ક્સના પુનર્વિકાસમાં સક્રિય છે.
કંપનીના મેનેજમેન્ટ અનુસાર, રિયલ એસ્ટેટ વર્ટિકલને અલગ કરવાથી એક એવું ધ્યાન કેન્દ્રિત (Focused) પ્લેટફોર્મ તૈયાર થશે જે નવા રોકાણકારો, કન્સ્ટ્રક્શન પાર્ટનર્સ અને ગ્લોબલ ફાઇનાન્સિયલ સંસ્થાઓને આકર્ષવામાં મદદ કરશે. નોંધનીય છે કે આ પહેલાં જૂન મહિનામાં પણ વેદાંતે તેના ચાર અલગ-અલગ વર્ટિકલ્સ (પાવર, ઓઇલ એન્ડ ગેસ, આયર્ન એન્ડ સ્ટીલ અને એલ્યુમિનિયમ) ને શેરબજારમાં સ્વતંત્ર રીતે લિસ્ટ કર્યા હતા. આ જાહેરાત બાદ આજે વેદાંત લિમિટેડનો શેર 0.8% ના સુધારા સાથે ₹266.65 ની સપાટીએ બંધ રહ્યો હતો.