* સૌરવ દાસ અને આશુતોષ રાંકાનો બીજો કેસ પણ ક્રાઇમ બ્રાન્ચને સોંપાયો : દિલ્હી પોલીસે કોકરોચ જનતા પાર્ટીના નેતાઓ સૌરવ દાસ અને આશુતોષ રાંકાને લગતો બીજો કેસ પણ ક્રાઇમ બ્રાન્ચને સોંપ્યો છે. હવે બંને કેસની તપાસ આ શાખા કરશે. જંતરમંતર ખાતે અનધિકૃત પ્રવેશનો આરોપ છે. બંને નેતાઓએ ન્યાયિક કસ્ટડી વધારવાના આદેશને દિલ્હી હાઇકોર્ટમાં પડકાર્યો છે અને અરજીની તાત્કાલિક સુનાવણી કરવાની માગણી કરી છે.

* ફ્રાન્સમાં હિંસક દેખાવો સામે પોલીસની મદદે સૈન્ય ઉતારવાનો નિર્ણય : ફ્રાન્સમાં હિંસક દેખાવો, આગચંપી અને લૂંટફાટ બાદ સરકારે પોલીસની મદદ માટે સૈન્ય ઉતારવાનો નિર્ણય લીધો છે. આગામી શનિવારના દેખાવો માટે વિશાળ સુરક્ષા બંદોબસ્ત રહેશે. પેરિસ, માર્સેઇ અને લિયોન સહિતના શહેરોમાં અશાંતિ ફેલાઈ હતી. સરકારે અગાઉની વ્યવસ્થામાં ખામીઓ સ્વીકારી છે. અસરગ્રસ્ત વિસ્તારોમાં કર્ફ્યૂથી સ્થિતિ કાબૂમાં લાવવાના પ્રયાસો હાલ પણ ચાલુ છે.

* રૂબિયોના પ્રવાસનો બીજો દિવસ: અદાણી અને ટાટા ચેરમેન સાથે મુલાકાત : ભારતની ત્રણ દિવસની મુલાકાતે આવેલા અમેરિકાના વિદેશમંત્રી માર્કો રૂબિયોના પ્રવાસનો આજે બીજો દિવસ છે. મુંબઈમાં સવારે ૮.૩૦ વાગ્યે ગૌતમ અદાણી અને ૯ વાગ્યે ટાટા જૂથના ચેરમેન એન. ચંદ્રશેખરન સાથે મુલાકાત થઈ છે. ત્યારબાદ જામનગરમાં રિલાયન્સના રિફાઇનરી સંકુલનો પ્રવાસ ગોઠવાયો છે. મુલાકાતમાં ઊર્જા, વેપાર અને રોકાણમાં સહકાર વધારવા પર ભાર છે.

* રશિયા સાથે સમજૂતી કરો, નહીં તો ગંભીર પરિણામો ભોગવો: ઝેલેન્સ્કીને ટ્રમ્પની ફરી ધમકી : અમેરિકાના રાષ્ટ્રપતિ ડોનાલ્ડ ટ્રમ્પે યુક્રેનના રાષ્ટ્રપતિ વોલોદિમિર ઝેલેન્સ્કીને રશિયા સાથેનું યુદ્ધ સમાપ્ત કરવા સમજૂતી તરફ વધવા કહ્યું છે. તેમણે ચેતવણી આપી કે સમાધાનના પ્રયાસો નહીં થાય તો ગંભીર પરિણામો આવી શકે છે. ટ્રમ્પે યુક્રેને યુદ્ધનો ઉકેલ લાવવાની ઇચ્છા દર્શાવવી જરૂરી હોવાનું જણાવ્યું. શાંતિવાટાઘાટો માટે કીવ પર અમેરિકાનું દબાણ વધ્યું છે.

* ભારત–ન્યૂઝીલેન્ડની પ્રથમ ટી૨૦નો પાવરપ્લે ટિકટોક પર મફત બતાવાશે : ન્યૂઝીલેન્ડ ક્રિકેટ ભારત સામે ૨૨ ઓક્ટોબરે ક્રાઇસ્ટચર્ચમાં રમાનારી પ્રથમ ટી૨૦ મેચની પ્રથમ ઇનિંગ્સની શરૂઆતની છ ઓવર ટિકટોક પર ફ્રી માં જીવંત પ્રસારિત કરશે. આ સુવિધા ન્યૂઝીલેન્ડના દર્શકો માટે જાહેર કરાઈ છે. આખી મેચનું પ્રસારણ થ્રી અને થ્રીનાઉ પર ઉપલબ્ધ રહેશે. ક્રિકેટ તરફ યુવા દર્શકોને આકર્ષવાના પ્રયાસરૂપે આ પહેલ કરવામાં આવી છે.

* ભારત–અમેરિકા વેપાર કરાર અત્યંત નજીક: ક્રમ તો પછી રૂબિયોનો પણ સંકેત: અલગ સ્વરૂપનો કરાર થવાનો ટ્રમ્પનો નિર્દેશ :ભારત અને અમેરિકા વેપાર કરારને અંતિમ સ્વરૂપ આપવાની અત્યંત નજીક હોવાનું અમેરિકાના વિદેશમંત્રી માર્કો રૂબિયોએ જણાવ્યું છે. તેમના મુજબ ૯૯ ટકા કામ પૂર્ણ થયું છે અને બાકી શબ્દપ્રયોગ અંગે સહમતી જરૂરી છે. રાષ્ટ્રપતિ ડોનાલ્ડ ટ્રમ્પે પણ કરાર નજીક હોવાનું કહી અગાઉના કરારોથી તેનું સ્વરૂપ અલગ હશે તેવો સંકેત આપ્યો છે.

* એસબીઆઇના ૩.૭૫ લાખ ગ્રાહક રેકોર્ડ લીક થયાનો દાવો : સ્ટેટ બેંક ઓફ ઇન્ડિયાના ૩.૭૫ લાખ ગ્રાહક રેકોર્ડ અને ૨,૭૨૨ પીડીએફ દસ્તાવેજો મેળવ્યાનો સિરિયસિમ હેકર જૂથે દાવો કર્યો છે. તેમાં વ્યક્તિગત વિગતો, લોન અરજીઓ, ખાતું ખોલાવવાનાં ફોર્મ અને રહેણાકનાં સરનામાં સામેલ હોવાનું કહેવાય છે. સાયબરપલ્સ૫૬ દ્વારા સામે આવેલા આ દાવાની સ્વતંત્ર ખરાઈ થઈ નથી. ડેટા લીકને સત્તાવાર પુષ્ટિ મળી નથી.