મુંબઈ, તા.૧૭: ભારત અને અમેરિકા વચ્ચેના દ્વિપક્ષીય અને વ્યૂહાત્મક સંબંધોને નવી ઊંચાઈઓ પર લઈ જવા માટે યુનાઇટેડ સ્ટેટ્સે એક મોટું કદમ ઉઠાવ્યું છે. અમેરિકાના અત્યંત અનુભવી અને વરિષ્ઠ રાજદ્વારી યુરી આર. ફેડકીવ (Yuri R. Fedkiw) ની મુંબઈમાં નવા યુએસ કોન્સ્યુલ જનરલ (Consul General) તરીકે નિમણૂક કરવામાં આવી છે. મુંબઈ સ્થિત યુએસ કોન્સ્યુલેટ જનરલ દ્વારા જારી કરાયેલી સત્તાવાર અખબારી યાદી અનુસાર, તેમણે ૭ જુલાઈ, ૨૦૨૬ ના રોજ ઔપચારિક રીતે પોતાનો કાર્યભાર સંભાળી લીધો છે.

પશ્ચિમ ભારતમાં અમેરિકાના આર્થિક હિતોને આગળ ધપાવવા, સુરક્ષા ભાગીદારીને વધુ દ્રઢ કરવા અને બંને દેશો વચ્ચેના વ્યાપારી સહયોગને ગાઢ બનાવવા માટે ફેડકીવ અગ્રણી પ્રાદેશિક નેતાઓ અને હિસ્સેદારો સાથે મળીને કામ કરશે. આ હાઈ-પ્રોફાઈલ નિમણૂકથી આગામી દિવસોમાં મહારાષ્ટ્ર સહિતના પશ્ચિમ ભારતના રાજ્યોમાં યુએસ રોકાણ અને સહયોગ વધવાની આશા છે.

તાલિબાન સાથે વાટાઘાટોથી લઈને જાપાન સુધીનો અદ્ભુત અનુભવ

યુરી આર. ફેડકીવ અમેરિકન વિદેશ સેવામાં એક બહુ મોટું અને આદરણીય નામ છે. મુંબઈ આવતા પહેલા તેઓ સ્વિટ્ઝર્લૅન્ડના બર્ન ખાતે રાજકીય-આર્થિક બાબતોના કાઉન્સેલર અને ડેપ્યુટી ચીફ ઑફ મિશન તરીકે ફરજ બજાવતા હતા. તેમની ભવ્ય રાજદ્વારી કારકિર્દી દરમિયાન તેમણે યુક્રેન, પોલેન્ડ, ઇરાક, સ્લોવેનિયા અને જાપાન જેવા દેશોમાં યુએસ એમ્બેસીમાં મહત્વની ભૂમિકાઓ ભજવી છે.

સૌથી રસપ્રદ વાત એ છે કે, વર્ષ ૨૦૨૧ માં જ્યારે અફઘાનિસ્તાનમાં મોટો સત્તાપલટો થયો, ત્યારે તેમણે કતારમાં 'અફઘાનિસ્તાન બાબતોના એકમ' ની સ્થાપનામાં મુખ્ય ભૂમિકા ભજવી હતી અને માનવ અધિકારો તેમજ સુરક્ષા જેવા જટિલ મુદ્દાઓ પર તાલિબાન સાથે સીધી વાટાઘાટો કરી હતી. આ સિવાય તેઓ પાકિસ્તાનના લાહોરમાં કોન્સ્યુલ જનરલ અને ચીનના ચેંગડુમાં કોન્સ્યુલ તરીકે પણ સેવા આપી ચૂક્યા છે.

ભારતીય સંસ્કૃતિને જાણવા ઉત્સુક છે નવા કોન્સ્યુલ જનરલ

રાજદ્વારી સેવાઓમાં જોડાતા પહેલા ફેડકીવે દક્ષિણ-પશ્ચિમ જાપાનની સ્થાનિક સરકાર સાથે પણ કામ કર્યું હતું. તેઓ આંતરરાષ્ટ્રીય બાબતોમાં બે માસ્ટર ઓફ આર્ટ્સ (MA) ડિગ્રી ધરાવે છે. મુંબઈમાં પોતાના કાર્યકાળને લઈને તેઓ ખૂબ જ ઉત્સાહિત છે. યુએસ કોન્સ્યુલેટના જણાવ્યા અનુસાર, ફેડકીવ પોતાની સત્તાવાર જવાબદારીઓ નિભાવવાની સાથે-સાથે ભારતની સમૃદ્ધ સંસ્કૃતિ, વિવિધ ભાષાઓ અને અહીંના જોવાલાયક ઐતિહાસિક સ્થળોને નજીકથી જાણવા અને તેનો અનુભવ કરવા માટે ભારે ઉત્સુક છે.