મુંબઈ : મુંબઈની લોકલ ટ્રેનોમાં મુસાફરો વચ્ચે વધતી અશાંતિ અને હિંસાની ઘટનાઓ અટકવાનું નામ નથી લઈ રહી. તાજેતરમાં સોશિયલ મીડિયા પર એક ચોંકાવનારો વીડિયો સામે આવ્યો છે, જેમાં બે મહિલાઓ એક અન્ય મહિલા મુસાફર પર હુમલો કરતી નજરે ચડે છે. આ ઘટના સોમવારે સવારે ચર્ચગેટથી ડહાણુ જતી લોકલ ટ્રેનના મહિલા ડબ્બામાં બની હોવાનું સામે આવ્યું છે. વીડિયોમાં સ્પષ્ટ જોઈ શકાય છે કે બે મહિલાઓ મળીને એક મહિલા મુસાફરને બેરહેમીથી ચંપલ ફટકારી રહી છે.

આ ઘટના દરમિયાન ડબ્બામાં અન્ય ઘણી મહિલાઓ પણ ઉપસ્થિત હતી, પરંતુ કોઈએ પણ ઝઘડો અટકાવવાની કે વચ્ચે પડવાની તસ્દી લીધી ન હતી. સોશિયલ મીડિયા પર આ વીડિયો વાયરલ થયા બાદ નેટીઝન્સે આક્રોશ વ્યક્ત કર્યો છે. લોકો આ હુમલાની સખત શબ્દોમાં નિંદા કરી રહ્યા છે અને દોષિત મહિલાઓ સામે કડક કાર્યવાહી કરવાની માંગ કરી રહ્યા છે. એક સોશિયલ મીડિયા યુઝરે લખ્યું છે કે આવી મહિલાઓ સામે પણ તાત્કાલિક કાયદાકીય પગલાં લેવા જોઈએ કારણ કે તેઓ એવું વર્તન કરી રહી છે જાણે ટ્રેન તેમના પિતાની હોય.

જોકે, આ સમગ્ર ઝઘડા પાછળનું ચોક્કસ કારણ હજુ સુધી અસ્પષ્ટ છે અને કયા સંજોગોમાં આ મારામારી થઈ તેની તપાસ ચાલી રહી છે. આ ઘટનાએ મુંબઈની લોકલ ટ્રેનોમાં મુસાફરોની સુરક્ષા સામે ફરી એકવાર મોટો પ્રશ્નાર્થ ચિહ્ન મૂકી દીધો છે. અગાઉ પણ આવા કિસ્સાઓ સામે આવ્યા છે જેમાં ટ્રેનની અંદર મુસાફરો વચ્ચે સામાન્ય બાબતો પર ઉગ્ર બોલાચાલી અને મારામારી થતી હોય છે.

ઉલ્લેખનીય છે કે આ ઘટનાના થોડા દિવસો પહેલા જ ચર્ચગેટથી વિરાર જતી ફાસ્ટ લોકલ ટ્રેનમાં બે પુરુષો વચ્ચે પણ હિંસક ઝઘડો થયો હતો. દરવાજા પાસે ઊભા રહેવાની જગ્યા બાબતે થયેલી તકરાર એટલી વધી ગઈ હતી કે એક મુસાફર સંતુલન ગુમાવીને ચાલુ ટ્રેને પ્લેટફોર્મ પર પટકાયો હતો. સદનસીબે ટ્રેનની ગતિ ઓછી હોવાથી તેને ગંભીર ઈજાઓ થઈ ન હતી. આવી સતત બની રહેલી ઘટનાઓ દર્શાવે છે કે મુંબઈની લોકલ ટ્રેનોમાં મુસાફરી કરતી વખતે સામાન્ય લોકોની સુરક્ષા માટે રેલવે પ્રશાસને વધુ કડક પગલાં લેવાની જરૂર છે.