​ભુવનેશ્વર: દેશમાં સરકારી બાબુઓ અને ભ્રષ્ટ અધિકારીઓ સામે એન્ટિ-કરપ્શન એજન્સીઓ દ્વારા સતત સકંજા કસવામાં આવી રહ્યો છે, ત્યારે ઓડિશામાંથી ભ્રષ્ટાચારનો વધુ એક ચોંકાવનારો મામેલો સામે આવ્યો છે. ઓડિશા વિજિલન્સ વિભાગે એક મોટી કાર્યવાહી હાથ ધરીને જગતપુર સ્થિત મહાનદી નોર્ધન ડિવિઝનના સુપરિન્ટેન્ડિંગ ઈજનેર પ્રસેનજિત દાસના ઠેકાણાઓ પર દરોડા પાડ્યા હતા. આ દરમિયાન તેમની પાસેથી અંદાજે રૂ. 21,88,620 ની તોસિંગ ભરેલી બેનામી અને શંકાસ્પદ રોકડ રકમ મળી આવતા સત્તાવાળાઓ પણ ચોંકી ઉઠ્યા હતા. રોકડની રકમ એટલી મોટી હતી કે તેને ગણવા માટે અધિકારીઓએ નોટ ગણવાના મશીનો મંગાવવા પડ્યા હતા.

​વિજિલન્સ વિભાગના વરિષ્ઠ અધિકારીઓ દ્વારા આપવામાં આવેલી સત્તાવાર માહિતી અનુસાર, લાંબા સમયથી એવી ગુપ્ત બાતમીઓ મળી રહી હતી કે ઉપરોક્ત ઈજનેર વિવિધ વિકાસ કાર્યો અને પ્રોજેક્ટ્સ સંભાળતા ઠેકેદારો પાસેથી મોટા પ્રમાણમાં લાંચની રકમ ઉઘરાવી રહ્યા છે. આ ઇનપુટના આધારે સતત મોનિટરિંગ કરવામાં આવ્યું હતું અને એક ખાસ ઓપરેશન અંતર્ગત ભુવનેશ્વરના એજી ચોક પાસેથી પ્રસેનજિત દાસની કારને આંતરીને તપાસ કરવામાં આવી હતી. આ દરમિયાન તેમની કારમાંથી જ રૂ. 7,28,620 ની રોકડ રકમ મળી આવી હતી.

​કારમાંથી રોકડ મળ્યા બાદ વિજિલન્સ ટીમે તેમના સત્તાવાર નિવાસસ્થાને અને ફ્લેટ પર પણ દરોડાની કાર્યવાહી હાથ ધરી હતી. ઘરની સઘન તલાશી લેતી વેળાએ વધુ રૂ. 14,60,000 ની બેનામી રોકડ મળી આવી હતી. આમ, કાર અને ફ્લેટ મળીને કુલ રૂ. 21,88,620 ની રોકડ રકમ જપ્ત કરવામાં સફળતા મળી છે. નોટોના મોટા બંડલો જોઈને અધિકારીઓએ ગણતરી માટે ખાસ મશીનોનો સહારો લેવો પડ્યો હતો.

​આ મામલે ભુવનેશ્વર વિજિલન્સ પોલીસ સ્ટેશન ખાતે પ્રસેનજિત દાસ વિરુદ્ધ ભ્રષ્ટાચાર નિવારણ અધિનિયમ (પ્રિવેન્શન ઓફ કરપ્શન એક્ટ)ની સંબંધિત કલમો હેઠળ ગુનો નોંધવામાં આવ્યો છે. વિજિલન્સ વિભાગે આરોપી ઈજનેરને કસ્ટડીમાં લઈને પૂછપરછ શરૂ કરી દીધી છે કે આ નાણાં કયા-કયા ઠેકેદારો પાસેથી અને કયા હેતુસર વસૂલવામાં આવ્યા હતા. આ હાઈ-પ્રોફાઈલ ભ્રષ્ટાચાર પ્રકરણમાં આગામી સમયમાં વધુ મોટા ખુલાસા થવાની પૂરી શક્યતાઓ સેવાઈ રહી છે.