જમ્મુ : શિયાળા પહેલાં નિયંત્રણ રેખા અને આંતરરાષ્ટ્રીય સરહદે સુરક્ષા વ્યવસ્થા વધુ સઘન બનાવવામાં આવી છે. પૂંછના કૃષ્ણાઘાટી વિસ્તારમાં બારૂદી સુરંગના વિસ્ફોટમાં ચાર શંકાસ્પદ ઘૂસણખોરોનાં મોત અને સુરનકોટમાં શસ્ત્રો મળ્યા બાદ સેના, સીમા સુરક્ષા દળ તથા પોલીસ સંવેદનશીલ વિસ્તારોમાં સંયુક્ત અભિયાન ચલાવી રહ્યાં છે.

અહેવાલ મુજબ, ચાલુ વર્ષે સરહદે ઘૂસણખોરીના આઠ પ્રયાસ નિષ્ફળ બનાવાયા છે. શિયાળામાં ધુમ્મસ અને હિમવર્ષાથી દેખરેખમાં અવરોધ ઊભા થવાની શક્યતાને ધ્યાનમાં રાખીને ગશ્ત, તકનીકી દેખરેખ અને ગુપ્તચર માહિતીના આધારે કાર્યવાહી પર ભાર મુકાયો છે.

સુરનકોટના એક ઠેકાણેથી એક એકે-૪૭ રાઇફલ, છ હાથબોમ્બ, ૩૦ કારતૂસ અને તબીબી સામગ્રી મળી હતી. આંતરરાષ્ટ્રીય સરહદે ડ્રોન મારફત શસ્ત્રો અને નશીલા પદાર્થો પહોંચાડવાની આશંકા પણ સુરક્ષા એજન્સીઓ માટે પડકાર બની છે.