બેંગકોક, તા.૦૪: વિશ્વભરમાં પોતાની રંગીન નાઇટલાઇફ માટે જાણીતા થાઇલેન્ડના પ્રખ્યાત પટાયા શહેરમાં મધ્યરાત્રિએ યુએસ નેવીના ખલાસીઓએ ભારે વિવાદ ઊભો કર્યો છે. અમેરિકાના પરમાણુ સંચાલિત વિશાળ વિમાનવાહક જહાજ 'USS અબ્રાહમ લિંકન' ના પટાયા બંદર પર આગમન બાદ, રજા માણવા નીકળેલા બે ખલાસીઓ વચ્ચે પ્રખ્યાત 'વોકિંગ સ્ટ્રીટ' નજીક દારૂના નશામાં ધિંગાણું સર્જાયું હતું. બંને ખલાસીઓ વચ્ચે ભારે અવાજ સાથે બોલાચાલી અને તકરાર શરૂ થતાં આસપાસના સ્થાનિક રહીશોમાં અફડાતફડી મચી ગઈ હતી અને મામલો વણસે તે પહેલાં જ થાઈ પોલીસને બોલાવવી પડી હતી.

પટાયા પોલીસ વડા કર્નલ અનેક સ્રાથોંગ્યુના જણાવ્યા અનુસાર, બંને અમેરિકી સૈનિકો ભારે નશાની હાલતમાં હતા અને રસ્તા પર મોટેથી બૂમાબૂમ કરીને એકબીજા સાથે લડી રહ્યા હતા. સ્થાનિક લોકોની ફરિયાદ બાદ પોલીસે ઘટનાસ્થળે પહોંચી સ્થિતિ કાબૂમાં લીધી હતી. જોકે, થાઇલેન્ડ પોલીસે આ ઘટનાને સામાન્ય ગણાવીને ખલાસીઓ સામે કોઈ કાનૂની ગુનો નોંધ્યો નથી. તેના બદલે, યુએસ નેવીના શિસ્ત વિભાગે તાત્કાલિક પગલાં ભરીને આ બંને ખલાસીઓને પટાયાના નાઇટલાઇફ ઝોનમાંથી હટાવીને સીધા તેમના 'USS અબ્રાહમ લિંકન' જહાજ પર પરત ધકેલી દીધા છે અને મુલાકાતના બાકીના દિવસો માટે તેમના બહાર નીકળવા પર પ્રતિબંધ મૂકી દીધો છે.

ઉલ્લેખનીય છે કે, 'USS અબ્રાહમ લિંકન' જહાજના આશરે ૫,૦૦૦ જેટલા ખલાસીઓ અને મરીન્સ સતત ૨૬૦ દિવસથી વધુ સમય દરિયામાં વિતાવ્યા બાદ, કુલ ૨૮૬ દિવસની લાંબી તૈનાતી પછી થાઇલેન્ડના લેમ ચાબાંગ પોર્ટ પર પહોંચ્યા છે. લાંબા સમયના માનસિક થાક અને તણાવ વચ્ચે આ ખલાસીઓના આગમનથી પટાયાના સ્થાનિક પ્રવાસન અને વેપાર-ધંધાને મોટો આર્થિક ટેકો મળવાની આશા હતી, પરંતુ આ શરમજનક ઘટનાએ ક્ષણભર માટે સુરક્ષા એજન્સી દોડતી કરી દીધી હતી.