મુંબઈ, તા. 17: ભારતીય ક્રિકેટના સુપરસ્ટાર વિરાટ કોહલી મેદાન પર રન ફટકારે કે ન ફટકારે, પણ સોશિયલ મીડિયાના મેદાનમાં તે હંમેશા ટોક ઓફ ધ ટાઉન રહે છે. તાજેતરમાં જર્મન બ્યુટી અને પ્રખ્યાત ઇન્ફ્લુએન્સર લિઝલાઝ (Lizlaz) ની એક બોલ્ડ તસવીર પર વિરાટ કોહલીએ 'લાઇક' કર્યું હોવાના સમાચાર વાયુવેગે ફેલાઈ રહ્યા છે. આ ઘટના બાદ નેટીઝન્સ અને મીમ પેજીસ સક્રિય થઈ ગયા છે અને રમુજી પ્રતિક્રિયાઓનો વરસાદ થઈ રહ્યો છે.
સ્ક્રીનશોટ થયા વાયરલ
સોશિયલ મીડિયા પર નજર રાખીને બેઠેલા ચાહકોએ તરત જ ઇન્સ્ટાગ્રામ પર આ હિલચાલ નોંધી લીધી અને તેના સ્ક્રીનશોટ પ્લેટફોર્મ પર ફરતા કરી દીધા. લિઝલાઝ જેવી આંતરરાષ્ટ્રીય ઇન્ફ્લુએન્સરની પોસ્ટ પર વિરાટનું નામ દેખાતા જ મીમબાજોને જાણે લોટરી લાગી હોય તેમ પરિસ્થિતિ પર રમુજી ટિપ્પણીઓ શરૂ કરી દીધી છે. ઘણા યુઝર્સ અનુષ્કા શર્માના નામે રમૂજી મીમ્સ બનાવીને વિરાટની ખેંચાઈ કરી રહ્યા છે.
અગાઉ પણ બની છે આવી ઘટના
રસપ્રદ વાત એ છે કે, વિરાટ કોહલી માટે આ કોઈ નવી વાત નથી. આ પહેલા પણ અભિનેત્રી અવનીત કૌરની એક પોસ્ટ પર ભૂલથી લાઇક થઈ જવાને કારણે વિરાટ ચર્ચામાં આવ્યો હતો. તે સમયે કોહલીએ સ્પષ્ટતા કરી હતી કે ઘણીવાર ફીડ્સ બ્રાઉઝ કરતી વખતે અથવા અલ્ગોરિધમિક ભૂલને કારણે અજાણતામાં આવી પ્રવૃત્તિ થઈ શકે છે. આ જૂના કિસ્સાને યાદ કરીને ચાહકો હવે કહી રહ્યા છે કે, "આ વખતે પણ અલ્ગોરિધમની જ ભૂલ હશે!"
ઇન્ટરનેટ પર મીમ ફેસ્ટ
કોહલીની આ નાનકડી સોશિયલ મીડિયા એક્ટિવિટીએ આખું ઇન્ટરનેટ માથે લીધું છે. ફેન્ડમ, હ્યુમર અને અટકળોના મિશ્રણ સાથે આ કિસ્સો હાલ ટ્રેન્ડિંગ વિષય બની ગયો છે. ભલે આ એક ભૂલ હોય કે માત્ર અફવા, પણ તે દર્શાવે છે કે વિરાટ કોહલી સાથે જોડાયેલી નાની એવી વાત પણ આખા દેશમાં કેવી ચર્ચા જગાવી શકે છે. હાલ પૂરતું તો, સોશિયલ મીડિયા યુઝર્સ આ 'લાઇક' કાંડની મજા માણી રહ્યા છે.