નવી દિલ્હી (ન્યૂઝફર્સ્ટ) : ચીન દ્વારા ભારતમાં વિઝા પ્રક્રિયામાં મહત્ત્વપૂર્ણ ફેરફાર કરવામાં આવ્યો છે. આગામી ૨૬ ઓક્ટોબરથી નવી દિલ્હી, મુંબઈ અને કોલકાતા સ્થિત ચાઇનીઝ વિઝા એપ્લિકેશન સેન્ટર્સ (વીએફએસ) દ્વારા નવી વિઝા અરજીઓ સ્વીકારવાનું બંધ કરવામાં આવશે. આ ફેરફાર બાદ નવી દિલ્હી સ્થિત ચીની દૂતાવાસ અને મુંબઈ સ્થિત કોન્સ્યુલેટ જનરલ દ્વારા સીધી જ વિઝા અરજીઓ સ્વીકારવાની પ્રક્રિયા હાથ ધરવામાં આવશે.

નવી વ્યવસ્થા અંતર્ગત રાજ્યવાર સબમિશન નિયમો નક્કી કરવામાં આવ્યા છે, જેના આધારે મહારાષ્ટ્ર અને કર્ણાટકના અરજદારોએ મુંબઈ ખાતે અરજી જમા કરાવવાની રહેશે. જ્યારે પશ્ચિમ બંગાળ, ઓડિશા, ઝારખંડ, બિહાર અને છત્તીસગઢના અરજદારોએ હાલ પૂરતું નવી દિલ્હી ખાતે અરજી કરવાની રહેશે. આ ઉપરાંત અન્ય તમામ રાજ્યોના અરજદારો પણ નવી દિલ્હી સ્થિત દૂતાવાસનો જ ઉપયોગ કરશે.

અરજદારોએ રૂબરૂમાં પાસપોર્ટ અને સહાયક દસ્તાવેજો જમા કરાવતા પહેલા ઓનલાઈન ફોર્મ ભરીને પ્રાથમિક મંજૂરી મેળવવી અનિવાર્ય રહેશે. ૨૩ ઓક્ટોબરના રોજ સાંજે ૫ વાગ્યા પછી સબમિટ કરાયેલી ઓનલાઈન અરજીઓ પર કોઈ સર્વિસ ફી વસૂલવામાં આવશે નહીં, જ્યારે અગાઉની અરજીઓ માટે પહેલેથી ચૂકવેલી ફી બિન-રિફંડપાત્ર રહેશે. પ્રક્રિયા પૂર્ણ થયેલા પાસપોર્ટ સંબંધિત સેન્ટર્સ પરથી ૩૦ ઓક્ટોબરના રોજ બપોરે ૧૨ વાગ્યા સુધી એકત્રિત કરી શકાશે.