રાજકોટ, તા. 03: આજના સમયમાં વિદેશ પ્રવાસનું સપનું જોવું સરળ બન્યું છે, પરંતુ ત્યાં પહોંચ્યા પછી પૈસાના વ્યવહારમાં થતી ગરબડ અને ફોરેક્સ (વિદેશી ચલણ) ના છુપાયેલા ખર્ચ પ્રવાસીઓનું ટેન્શન વધારી રહ્યા છે. 'વાઈઝના પાસપોર્ટ અને પૈસા: ઈન્ડિયા ટ્રાવેલ મની રિપોર્ટ 2026' માં ચોંકાવનારા તથ્યો સામે આવ્યા છે. રિપોર્ટ અનુસાર, ટેક્સ કલેક્ટેડ એટ સોર્સ (TCS) માં થયેલા ઘટાડા પછી લગભગ 78% ભારતીયો હવે વિદેશ પ્રવાસમાં વધુ ખર્ચ કરવા માટે સજ્જ થયા છે.
રોકડમાં જ હજુ પણ ભરોસો!
ભારત ભલે ડિજિટલ પેમેન્ટમાં આખી દુનિયામાં નામ કરી રહ્યું હોય, પરંતુ વિદેશ પ્રવાસના કિસ્સામાં પરિસ્થિતિ સાવ અલગ છે. આ અહેવાલ મુજબ, આંતરરાષ્ટ્રીય પ્રવાસ કરતા 38% ભારતીયો હજુ પણ મુસાફરી શરૂ કરતા પહેલા રોકડની અદલાબદલી (Currency Exchange) કરવાનું વધુ પસંદ કરે છે. બીજી તરફ, માત્ર 9% પ્રવાસીઓ જ આધુનિક 'ડિજિટલ મલ્ટિ-કરન્સી એકાઉન્ટ્સ' નો ઉપયોગ કરે છે.
શા માટે ફોરેક્સ ખર્ચ બજેટને ખોરવી નાખે છે?
પ્રવાસીઓની સૌથી મોટી ફરિયાદ એ છે કે વિનિમય દરમાં રહેલા 'હિડન માર્કઅપ' અને કિંમતની પારદર્શિતાનો અભાવ તેમને સમજવામાં મુશ્કેલી પડે છે. ખાસ કરીને એવા પ્રવાસીઓ માટે, જેઓ સફર દીઠ ₹1 લાખથી ઓછો ખર્ચ કરે છે, આ વધારાના નાના ચાર્જિસ પણ તેમના આખા બજેટને ખોરવી નાખે છે. એટલે જ હવે નવા જમાનાના પ્રવાસીઓ 'શૂન્ય ફોરેક્સ માર્કઅપ' વાળા કાર્ડ્સને વધુ પ્રાથમિકતા આપી રહ્યા છે.
કાર્ડ પસંદગીમાં શું છે મહત્વનું?
રિપોર્ટમાં એક રસપ્રદ વાત એ પણ સામે આવી છે કે, કાર્ડ દ્વારા મળતા રિવોર્ડ પોઈન્ટ્સ કે લાઉન્જ એક્સેસ કરતા ભારતીય પ્રવાસીઓ 'વૈશ્વિક સ્વીકૃતિ' (Global Acceptance) ને વધુ મહત્વ આપે છે. તેમને એવી નિશ્ચિતતા જોઈએ છે કે તેમનું કાર્ડ વિદેશની ધરતી પર કોઈપણ મુશ્કેલી વગર ચાલશે.
દક્ષિણપૂર્વ એશિયા છે પહેલી પસંદ
ભારતીય પ્રવાસીઓ માટે હજુ પણ દક્ષિણપૂર્વ એશિયા (થાઇલેન્ડ, બાલી અને સિંગાપોર) 34% સાથે સૌથી લોકપ્રિય ડેસ્ટિનેશન છે. ત્યારબાદ 15% લોકો યુરોપ અને 14% મધ્ય પૂર્વ તરફ વળે છે. જોકે, હવે યુવાનોમાં જાપાન અને દક્ષિણ કોરિયા જેવા દેશોનું આકર્ષણ પણ ઝડપથી વધી રહ્યું છે.
ટૂંકમાં, હવે ભારતીય પ્રવાસીઓ માત્ર ફરવા નથી માંગતા, પણ પૈસાના વ્યવહારમાં સ્માર્ટ બનીને પોતાના કમાણીના પૈસા બચાવવા પણ માંગે છે.