બેંગલુરુ, તા.૦૩: કર્ણાટકમાં મતદાર યાદીની ખાસ સઘન સમીક્ષા (SIR) ને લઈને ત્રીજા દિવસે પણ ભારે રાજકીય હોબાળો મચી ગયો છે. બૂથ લેવલ ઓફિસર્સ (BLO) ને નિયમ મુજબ ઘરે-ઘરે જઈને આ સર્વેક્ષણ કરવાની કડક સૂચના આપવામાં આવી છે, પરંતુ તેના બદલે લોજ (ચોલ્ટ્રી), ધાર્મિક સ્થળો અને સોસાયટીઓના કોન્ફરન્સ હોલમાં બેસીને સામૂહિક રીતે ફોર્મ ભરવાનું મોટું કૌભાંડ પ્રકાશમાં આવ્યું છે. આ મામલે કડક વલણ અપનાવતા રામનગરાના ડેપ્યુટી કમિશનર (DC) યશવંત વી. ગુરુકરે તુરંત જ રામનગર શહેરના ટીપુ નગર વિસ્તારના પ્રભારી ત્રણ BLO ને કારણદર્શક નોટિસ ફટકારી ખુલાસો માંગ્યો છે.
આ સમગ્ર વિવાદ ત્યારે વકર્યો જ્યારે કેન્દ્રીય મંત્રી અને જેડી(એસ) ના સુપ્રીમો એચ. ડી. કુમારસ્વામીએ રામનગરની એક ચોલ્ટ્રીમાં ચાલી રહેલા આ 'માસ સર્વે'ના પુરાવા અને વિડીયો સોશિયલ મીડિયા પર જાહેર કર્યા. આ મામલે ખુદ કર્ણાટકના ડેપ્યુટી ચીફ મિનિસ્ટર ડી. કે. શિવકુમારે પણ સ્વીકારવું પડ્યું છે કે, કોમ્યુનિટી હોલ કે જાહેર સ્થળોએ આ રીતે ફોર્મ વહેંચવા તે સંપૂર્ણપણે નિયમ વિરુદ્ધ છે અને અધિકારીઓએ ઘરે-ઘરે જઈને જ કામગીરી કરવી જોઈએ.
'ગેરકાયદે બાંગ્લાદેશીઓને ઘુસાડવાનું મોટું ષડયંત્ર' – કુમારસ્વામીનો ગંભીર આરોપ
કેન્દ્રીય મંત્રી કુમારસ્વામીએ આ ગેરરીતિ પાછળ દેશની સુરક્ષા સાથે જોડાયેલો અત્યંત ગંભીર આરોપ લગાવ્યો છે. તેમણે દાવો કર્યો છે કે મુખ્યમંત્રીના ગૃહ જિલ્લામાં આ પ્રક્રિયાની અખંડિતતા સાથે ખુલ્લેઆમ સમાધાન કરવામાં આવી રહ્યું છે અને બોગસ દસ્તાવેજોના આધારે ગેરકાયદેસર બાંગ્લાદેશી ઇમિગ્રન્ટ્સ (ઘૂસણખોરો) ના નામ મતદાર યાદીમાં ઉમેરવામાં આવી રહ્યા છે. તેમણે રામનગરાના ડેપ્યુટી કમિશનરને તાત્કાલિક સસ્પેન્ડ કરવાની અને કસૂરવાર અધિકારીઓને સેવામાંથી બરતરફ કરવાની માંગ કરી છે.
કુમારસ્વામીએ વધુમાં ઉમેર્યું કે, "બાંગ્લાદેશી ઘૂસણખોરો માટે સરકારી શેહ શરમે નકલી દસ્તાવેજો તૈયાર કરવા એ રાષ્ટ્રહિત વિરુદ્ધનું મોટું કૃત્ય છે. હું આ તમામ વિડીયો અને દસ્તાવેજી પુરાવા કેન્દ્રીય ગૃહ મંત્રી અમિત શાહ અને ભારતના ચૂંટણી પંચ (ECI) ને સુપરત કરવાનો છું અને આ સમગ્ર સર્વે પ્રક્રિયાને તાત્કાલિક રોકવાની અપીલ કરીશ."
રાજ્યભરમાંથી સામે આવી રહી છે આવી જ બેદરકારી
આ વિવાદ માત્ર રામનગરા પૂરતો સીમિત નથી. બેંગલુરુના જયનગર વિસ્તારમાં કથિત રીતે ઓફિસર્સે એપાર્ટમેન્ટના કોન્ફરન્સ હોલમાંથી જ કામ પતાવી દીધું હોવાના અહેવાલ છે, જ્યારે તુમાકુરુ જિલ્લાના કુનિગલ શહેરમાં લોકો એક ધાર્મિક સ્થળની અંદર બેસીને ફોર્મ ભરતા કેમેરામાં કેદ થયા છે. બીજી તરફ, શિવામોગા જિલ્લાના તિર્થહલ્લી તાલુકામાં તો રેશનિંગની દુકાન પર પોસ્ટર લગાવીને લોકોને ત્યાં જ ફોર્મ ભરવા બોલાવવામાં આવ્યા હતા. જોકે, અગુમ્બે વિસ્તારના અધિકારીઓએ બચાવ કર્યો છે કે ત્યાં ભારે વરસાદ અને ઘરો ખૂબ જ દૂર આવેલા હોવાના કારણે તેમણે એક જગ્યાએથી કામ કરવાની પરવાનગી માંગી હતી. જોકે, આ વિવાદે હવે કેન્દ્રીય સ્તરે મોટું સ્વરૂપ ધારણ કરી લીધું છે.