નવી દિલ્હી, તા.૧૯: ભારતીય સૈન્યના વીર યોદ્ધા અને દેશના એક અત્યંત પ્રતિષ્ઠિત રાજનેતા, ઉત્તરાખંડના ભૂતપૂર્વ મુખ્યમંત્રી મેજર જનરલ ભુવન ચંદ્ર ખંડુરી (નિવૃત્ત) એ આજે મંગળવારે અંતિમ શ્વાસ લીધા છે. તેમના અવસાનના સમાચારથી સમગ્ર દેશ સહિત ઉત્તરાખંડ રાજ્યમાં ઊંડા શોકની કાળી ડિબંગ ચાદર છવાઈ ગઈ છે. રાષ્ટ્રપતિ દ્રૌપદી મુર્મુ અને પ્રધાનમંત્રી નરેન્દ્ર મોદીએ આ મહાન દેશભક્તના નિધન પર ઘેરા દુઃખની લાગણી વ્યક્ત કરી છે અને દેશ પ્રત્યેના તેમના સર્વોચ્ચ સમર્પણને નમન કર્યા છે.

સોશિયલ મીડિયા પર પોતાની સંવેદના વ્યક્ત કરતાં રાષ્ટ્રપતિ દ્રૌપદી મુર્મુએ જણાવ્યું હતું કે, "મેજર જનરલ ભુવન ચંદ્ર ખંડુરીએ ભારતીય સેનામાં લાંબા સમય સુધી દેશની અનુકરણીય અને પ્રશંસનીય સેવા કરી હતી. સૈન્યમાંથી નિવૃત્ત થયા બાદ, તેમણે જાહેર જીવન અને સક્રિય રાજકારણમાં પ્રવેશ કર્યો અને ત્યાં પણ તેમણે અત્યંત પ્રામાણિક, સરળ, પારદર્શક અને વિકાસલક્ષી રાજકારણનું એક શ્રેષ્ઠ ઉદાહરણ સ્થાપિત કર્યું હતું." રાષ્ટ્રપતિએ ઉમેર્યું કે, ઉત્તરાખંડના ચોમુખી વિકાસ, સુશાસન (Good Governance) અને લોક કલ્યાણ પ્રત્યેની તેમની અતૂટ પ્રતિબદ્ધતા ઇતિહાસના પાના પર હંમેશા સુવર્ણ અક્ષરે અંકિત રહેશે. તેમણે શોકગ્રસ્ત પરિવાર અને તેમના લાખો શુભેચ્છકો પ્રત્યે આશ્વાસન પાઠવ્યું હતું.

સરહદની રક્ષાથી લઈને સંસદ સુધી અનમોલ યોગદાન

પ્રધાનમંત્રી નરેન્દ્ર મોદીએ પણ પૂર્વ મુખ્યમંત્રી ખંડુરીજીને શ્રદ્ધાંજલિ આપતાં તેમના બહુઆયામી વ્યક્તિત્વને યાદ કર્યું હતું. પીએમ મોદીએ જણાવ્યું કે, "દેશની સશસ્ત્ર સરહદોની રક્ષા કરવાથી લઈને દેશના રાજકીય ક્ષેત્ર સુધી, મેજર જનરલ ભુવન ચંદ્ર ખંડુરીએ આપેલું યોગદાન અમૂલ્ય છે, જેના માટે ભારત ભૂમિ તેમની હંમેશા ઋણી રહેશે. તેઓ ઉત્તરાખંડના વિકાસ માટે તન, મન અને ધનથી સમર્પિત રહ્યા હતા, જે તેમના મુખ્યમંત્રી તરીકેના સફળ કાર્યકાળ દરમિયાન જનતાએ પ્રત્યક્ષ નિહાળ્યું છે."

ઇન્ફ્રાસ્ટ્રક્ચર અને કનેક્ટિવિટીના પ્રણેતા

પીએમ મોદીએ વધુમાં ભારપૂર્વક જણાવ્યું હતું કે, અગાઉની કેન્દ્ર સરકારોમાં એક કુશળ કેન્દ્રીય મંત્રી તરીકેનો તેમનો કાર્યકાળ પણ દેશના તમામ રાજનેતાઓ માટે પ્રેરણાદાયક રહ્યો છે. તેમણે પોતાના મંત્રીપદ દરમિયાન દેશભરમાં રોડ, રસ્તા અને કનેક્ટિવિટીના માળખાને સુધારવા માટે રાત-દિવસ અથાક અને પ્રશંસનીય પ્રયાસો કર્યા હતા, જેનો લાભ આજે દેશ ભોગવી રહ્યો છે.

લશ્કરી શિસ્ત અને રાજકીય શુદ્ધતાના આ અનોખા સંગમ સમાન નેતાના જવાથી ભારતીય રાજનીતિમાં એક એવું શૂન્યાવકાશ સર્જાયું છે, જે ક્યારેય પુરાશે નહીં. દેશના અનેક રાજકીય પક્ષોના નેતાઓએ પણ તેમના નિધન પર ઘેરા શોકની લાગણી વ્યક્ત કરી છે.