હૈદરાબા : આજના કોર્પોરેટ યુગમાં કામનું દબાણ અને 'વર્ક-લાઇફ બેલેન્સ'નો અભાવ યુવાનો માટે સૌથી મોટી સમસ્યા બની રહ્યા છે. હૈદરાબાદની એક ૨૫ વર્ષીય સિવિલ એન્જિનિયર યુવતીએ સોશિયલ મીડિયા પર પોતાની પીડા ઠાલવી છે, જેણે દેશભરના યુવા કર્મચારીઓમાં ચર્ચા જગાવી છે. ૨૦૨૩માં પોતાનો અભ્યાસ પૂર્ણ કરનાર આ એન્જિનિયર હાલમાં હૈદરાબાદની એક જાણીતી બાંધકામ કંપનીમાં કામ કરે છે, પરંતુ દર મહિને માત્ર ₹૨૩,૦૦૦ના પગાર અને અઠવાડિયામાં ૬ દિવસના કામના દબાણે તેને માનસિક રીતે તોડી નાખી છે.

રવિવાર માત્ર થાક ઉતારવામાં જ નીકળી જાય છે

યુવતીએ સોશિયલ મીડિયા પ્લેટફોર્મ પર હૃદયસ્પર્શી પોસ્ટમાં લખ્યું છે કે, "હું ૬ દિવસના વર્ક-વીકથી સંપૂર્ણપણે થાકી ગઈ છું." તેણે પોતાની દૈનિક વ્યથા વર્ણવતા જણાવ્યું કે, ઓફિસથી ઘરે પહોંચ્યા પછી તેમાં એટલી પણ શક્તિ નથી બચતી કે તે ઘરના નાના-મોટા કામ કરી શકે, પરિવાર સાથે સમય વિતાવી શકે કે સાંજનો આનંદ માણી શકે. તેના મતે, રવિવારનો એક દિવસ તો માત્ર અઠવાડિયાના થાકમાંથી બહાર આવવામાં જ પૂરો થઈ જાય છે અને તે પહેલા જ સોમવારની સવાર ફરી દોડધામ લઈને આવી જાય છે.

"અમે મશીન નથી, માણસ છીએ!"

આ યુવતીએ આક્રોશ વ્યક્ત કરતા લખ્યું છે કે, "આપણે માણસો છીએ, કોઈના સામ્રાજ્યને વિસ્તારવા માટે મશીનો નથી. લગભગ દુનિયાના તમામ દેશો હવે ૫-દિવસીય કાર્ય સપ્તાહ (5-Day Work Week) અપનાવી રહ્યા છે, તો ભારત કેમ આટલું પાછળ છે?" તેણે મક્કમતાથી કહ્યું છે કે, તે હવે નવી નોકરી શોધી રહી છે અને જો તેને કોઈ કંપની અઠવાડિયામાં ૫ દિવસ કામ કરવાની તક આપશે, તો તે પગારમાં કાપ સહન કરવા પણ તૈયાર છે.

સોશિયલ મીડિયા પર યુઝર્સનો ટેકો અને આક્રોશ

આ પોસ્ટ વાયરલ થયા બાદ હજારો લોકોએ પોતાની સહાનુભૂતિ વ્યક્ત કરી છે. ઘણા વપરાશકર્તાઓએ તેને નવી તકો શોધવા અને વર્તમાન 'શોષણ' વાળી નોકરી છોડી દેવાની સલાહ આપી છે. એક યુઝરે આક્રોશ સાથે લખ્યું કે, "આ દેશે તમને નિષ્ફળ બનાવ્યા છે. અઠવાડિયામાં ૬ દિવસ માટે ₹૨૩,૦૦૦નું વેતન ખૂબ જ ઓછું છે. કાં તો નોકરી બદલો અથવા આ દેશ છોડવા સુધીનો વિચાર કરો."

અન્ય એક IT કર્મચારીએ પણ પોતાની આપવીતી જણાવતા કહ્યું કે તે પણ અઠવાડિયામાં ૬ દિવસ કામ કરીને થાકી ગયો છે અને હવે અપસ્કિલિંગ કરીને આ નોકરીને તિલાંજલિ આપવાની તૈયારી કરી રહ્યો છે. આ કિસ્સો ફરી એકવાર ભારતીય બાંધકામ અને કોર્પોરેટ ક્ષેત્રમાં કામદારોની માનસિક સ્વાસ્થ્યની સ્થિતિ અને ઓછા વેતન પર ગંભીર સવાલો ઉભા કરે છે.