​નવી દિલ્હી: પશ્ચિમ એશિયામાં ચાલી રહેલા ભૌગોલિક રાજકીય તણાવ અને વૈશ્વિક ઉર્જા બજારોમાં ઉથલપાથલ વચ્ચે અમેરિકાએ ભારત માટે પોતાના ઉર્જાના દરવાજા સંપૂર્ણપણે ખોલી દીધા છે. અમેરિકાના વિદેશ મંત્રી માર્કો રુબિયો ૨૩ મેથી શરૂ થનારી તેમની પ્રથમ સત્તાવાર ભારત મુલાકાતે આવી રહ્યા છે. આ મહત્વપૂર્ણ પ્રવાસ પહેલાં તેમણે મિયામીમાં પત્રકારો સાથે વાતચીત કરતા સ્પષ્ટ કર્યું હતું કે વોશિંગ્ટન ભારતની જરૂરિયાત મુજબ ગમે તેટલી માત્રામાં ઊર્જા અને ઇંધણ વેચવા માટે તૈયાર છે. તેમણે જણાવ્યું કે અમેરિકા હાલમાં તેના ઐતિહાસિક ઉત્પાદન અને નિકાસ સ્તરે છે, જેનો સીધો લાભ ભારત ઉઠાવી શકે છે.

​ભારત પોતાની ક્રૂડ ઓઈલની જરૂરિયાતોનો મોટો હિસ્સો આયાત કરે છે અને આ પુરવઠો મુખ્યત્વે હોર્મુઝની સામુદ્રધુની જેવા સંવેદનશીલ દરિયાઈ માર્ગો પરથી પસાર થાય છે. વર્તમાન વૈશ્વિક અસ્થિરતાને કારણે નવી દિલ્હીમાં લાંબાગાળાની ઊર્જા સુરક્ષા અને પુરવઠામાં વિવિધતા લાવવા અંગે ચિંતાઓ વધી રહી છે. આવી સ્થિતિમાં અમેરિકાનો આ પ્રસ્તાવ ભારત માટે વ્યૂહાત્મક રીતે ખૂબ જ મહત્વપૂર્ણ સાબિત થઈ શકે છે. અમેરિકા ઈચ્છે છે કે ટ્રમ્પ વહીવટીતંત્ર હેઠળ અમેરિકન ઉર્જા નિકાસ ભારતની આયાત પ્રોફાઇલમાં વધુ મોટો હિસ્સો બને.

​વિદેશ મંત્રી માર્કો રુબિયોએ ભારતને એક મહાન અને ભરોસાપાત્ર ભાગીદાર ગણાવતા ઉમેર્યું હતું કે બંને દેશો વચ્ચે ઘણા મહત્વના ક્ષેત્રોમાં સારો તાલમેલ છે. આ મુલાકાત દ્વિપક્ષીય સંબંધોને એક નવી ઊંચાઈ પર લઈ જશે. ઉર્જા સુરક્ષા ઉપરાંત વેનેઝુએલાના ક્રૂડ ઓઈલ અંગે પણ સંભવિત સહયોગ અંગે આ બેઠકોમાં ચર્ચા થવાની સંભાવના વ્યક્ત કરવામાં આવી છે. અમેરિકા તેના તેલ અને ગેસ ક્ષેત્રના વિસ્તરણ માટે ભારત જેવા વિશાળ ગ્રાહક દેશ સાથે લાંબાગાળાના કરારો કરવા ઉત્સુક છે.

​૨૩ થી ૨૬ મે દરમિયાન યોજાનારા આ ચાર દિવસીય પ્રવાસ દરમિયાન અમેરિકી વિદેશ મંત્રી નવી દિલ્હી ઉપરાંત કોલકાતા, આગ્રા અને જયપુરની પણ મુલાકાત લેશે. અમેરિકી વિદેશ વિભાગના જણાવ્યા અનુસાર, આ ઉચ્ચ સ્તરીય મુલાકાતનો મુખ્ય ધ્યાન કેન્દ્ર ઉર્જા સુરક્ષા, સંરક્ષણ સહયોગ, દ્વિપક્ષીય વ્યાપાર અને હિન્દ-પ્રશાંત ક્ષેત્રમાં સુરક્ષા વ્યવસ્થાને મજબૂત કરવા પર રહેશે. કેન્દ્રીય સ્તરે ગૃહમંત્રી અમિતભાઈ શાહ અને અન્ય વરિષ્ઠ નેતાઓ સાથે આ મુલાકાત દરમિયાન વ્યૂહાત્મક ચર્ચાઓ યોજાશે.