ભોપાલ, તા.૦૫: મધ્યપ્રદેશના ભોપાલ સ્થિત મિસરોદ વિસ્તારમાં આવેલી સરકારી નવીન હાયર સેકન્ડરી સ્કૂલમાં સોમવારે વિદ્યાર્થીઓએ વિજ્ઞાનના શિક્ષિકા વિરુદ્ધ વિરોધ પ્રદર્શન કરીને ભારે હંગામો મચાવ્યો હતો. ધોરણ ૧૧ના ગણિત અને જીવવિજ્ઞાન પ્રવાહના વિદ્યાર્થીઓએ શિક્ષિકા બબિતા કુશવાહ પર નાપાસ કરવાની ધમકી આપવા, પ્રોજેક્ટના નામે પૈસા માંગવા, શાળા પરિસરની સફાઈ કરાવવા અને શારીરિક મારપીટ જેવા ગંભીર આરોપો મૂક્યા હતા. આ ઘટનાના પગલે શિક્ષણ વિભાગે ત્વરિત કાર્યવાહી કરીને શિક્ષિકાની અન્ય શાળામાં બદલી કરી દીધી છે અને બે દિવસમાં સમગ્ર મામલાની નિષ્પક્ષ તપાસ કરવાના આદેશ આપ્યા છે.

વિરોધ કરી રહેલા વિદ્યાર્થીઓએ આક્ષેપ કર્યો હતો કે શિક્ષિકા બબિતા કુશવાહ તેમની અનૈતિક માંગણીઓ ન સ્વીકારનાર વિદ્યાર્થીઓને પરીક્ષામાં નાપાસ કરવાની ધમકી આપતા હતા. આ ઉપરાંત, વિદ્યાર્થીઓ પાસે વર્ગખંડની બેન્ચો ગોઠવવી, શાળાના પરિસરની સફાઈ કરાવવી અને રવિવારના દિવસે બોલાવીને વિવિધ ભરતી પરીક્ષાઓ દરમિયાન રોલ નંબર લખવા જેવા કામો કરાવવામાં આવતા હતા. "અમે શાળામાં અભ્યાસ કરવા આવીએ છીએ, કર્મચારી કે મજૂરની જેમ કામ કરવા નહીં," તેવો રોષ વિદ્યાર્થીઓએ વ્યક્ત કર્યો હતો.

વિદ્યાર્થીઓએ વધુમાં ઉમેર્યું હતું કે શિક્ષિકા પ્રોજેક્ટ વર્કના નામે દર મહિને નાણાં ઉઘરાવતા હતા અને એમ કહેતા હતા કે જેઓ નાણાકીય ખર્ચ ઉઠાવી શકે તેમણે જ વિજ્ઞાન પ્રવાહમાં ભણવું જોઈએ. એટલું જ નહીં, વર્ગ દરમિયાન પોતે મોબાઈલ ફોનમાં વ્યસ્ત રહેતા હતા અને વિરોધ કરનાર સીનિયર વિદ્યાર્થીઓને લોખંડના પાઈપ વડે ઢોર માર પણ મારવામાં આવતો હતો. 'જનરેશન આલ્ફા' ગણાતા આજના આધુનિક વિચારસરણી ધરાવતા વિદ્યાર્થીઓએ પોતાના અધિકારો માટે એકજૂથ થઈને ચાર કલાક સુધી શાળા બહાર પ્રદર્શન કર્યું હતું.

સામે પક્ષે શિક્ષિકા બબિતા કુશવાહે તમામ આરોપોને પાયાવિહોણા ગણાવીને ફગાવી દીધા હતા. તેમણે સ્પષ્ટતા કરી હતી કે તેઓ ૧૯૯૯થી શિક્ષણ ક્ષેત્રે કાર્યરત છે અને ભૌતિક વિજ્ઞાનમાં વિદ્યાર્થીઓ સારું પરિણામ લાવે તે માટે કડક વલણ અપનાવે છે. તેમણે પૈસા માંગવાના, નાપાસ કરવાની ધમકી આપવાના કે સફાઈ કામ કરાવવાના તમામ આરોપોને નકારી કાઢ્યા હતા.

આ ઘટના અંગે જિલ્લા શિક્ષણ અધિકારી અભિનવ આર્યાએ જણાવ્યું હતું કે, વિદ્યાર્થીઓની ફરિયાદોને ગંભીરતાથી લેવામાં આવી છે. શિક્ષિકાની બદલી કરી દેવામાં આવી છે અને તેમની જગ્યાએ વિદ્યાર્થીઓ માટે ભૌતિકશાસ્ત્રના નવા શિક્ષકની ગોઠવણ કરી દેવાઈ છે. તમામ આરોપોની તટસ્થ તપાસ હાથ ધરવામાં આવી છે અને બે દિવસની અંદર આ અંગેનો વિગતવાર અહેવાલ સામે આવશે.

ઉલ્લેખનીય છે કે, સન ૧૯૬૨માં સ્થાપિત આ શાળામાં શિક્ષિકા ૨૦૧૦થી કાર્યરત હતા. પોલીસ સ્ટેશનના અધિકારી વિમલેશ કુમાર રાયની મધ્યસ્થતા બાદ બપોરે વિદ્યાર્થીઓ વર્ગખંડમાં પરત ફર્યા હતા. આ ઘટનાએ સરકારી શાળાઓમાં શિક્ષણનું વાતાવરણ અને શિક્ષક-વિદ્યાર્થી સંબંધો અંગે નવી ચર્ચા જગાવી છે.