પુરી, તા. 04 જૂન, 2026 ઓડિશાના પવિત્ર અને પ્રવાસન સ્થળ પુરીમાં હાલમાં એક અદભૂત સાંસ્કૃતિક ઉત્સવનો માહોલ છે. બ્રિક્સ (BRICS) શિખર સંમેલન માટે આવેલા આંતરરાષ્ટ્રીય પ્રતિનિધિઓનું સ્વાગત કરવા માટે પુરીના દરિયાકિનારાને એક વિશાળ કેનવાસમાં ફેરવી દેવામાં આવ્યો છે. પ્રસિદ્ધ રેતી કલાકાર પદ્મશ્રી સુદર્શન પટનાયક અને તેમની ટીમે પોતાની કલાના જાદુથી રેતી પર એવી આકૃતિઓ કંડારી છે કે જે જોઈને પ્રતિનિધિઓ પણ મંત્રમુગ્ધ થઈ ગયા હતા.
રેતી પર જીવંત થઈ ઉઠી વૈશ્વિક એકતાની ભાવના
સુદર્શન પટનાયકની કલાકૃતિમાં બ્રિક્સ લોગો સાથે વૈશ્વિક શાંતિ અને સહકારનો સંદેશ ખૂબ જ સુંદર રીતે વણી લેવામાં આવ્યો છે. આ શિલ્પમાં મહિલાઓના સશક્ત ચહેરા અને 'બ્રિક્સ ઇન્ડિયા 2026' નો સંદેશ વિશ્વના નેતાઓને ભારતની વિવિધતા અને સંવાદિતાનો પરિચય કરાવે છે. બીજી તરફ, જાણીતા કલાકાર માનસ કુમાર સાહુએ ૧૫ મિનિટના એક અનોખા રેતી એનિમેશન દ્વારા મિત્રતા અને સહયોગની એવી વાર્તા કહી છે કે જેણે ઉપસ્થિત સૌને અભિભૂત કરી દીધા છે.
સાંસ્કૃતિક વિરાસત અને આધુનિકતાનો સંગમ
સાહુનું આ એનિમેશન માત્ર એક પ્રદર્શન નથી, પરંતુ તે પુરીના જગન્નાથ ધામના રિવાજો, દરિયાકિનારાના કુદરતી સૌંદર્ય અને ભારતની સમૃદ્ધ સાંસ્કૃતિક વિરાસતનો અરીસો છે. કલાકારોએ બ્રિક્સ રાષ્ટ્રો વચ્ચેના જોડાણને સાંસ્કૃતિક પ્રયાસો સાથે જોડીને સાબિત કરી દીધું છે કે, કલા કોઈ ભાષાની મહોતાજ નથી. તે વિશ્વવ્યાપી પ્રગતિ અને લોકો વચ્ચેના આદાન-પ્રદાનને પ્રોત્સાહન આપવાનું શ્રેષ્ઠ માધ્યમ છે.
શું છે BRICS કલ્ચર વર્કિંગ ગ્રુપ?
આ વર્ષે ભારત બ્રિક્સ કલ્ચર વર્કિંગ ગ્રુપ (BCWG) ની યજમાની કરી રહ્યું છે. બ્રાઝિલ, રશિયા, ભારત, ચીન અને દક્ષિણ આફ્રિકાના સાંસ્કૃતિક પ્રતિનિધિઓ વચ્ચે વારસા સંરક્ષણ અને લોકો-થી-લોકોના સંબંધોને મજબૂત કરવાના ઉદ્દેશ્યથી બુધવારે પુરીમાં ત્રણ દિવસીય કાર્યક્રમનો ભવ્ય પ્રારંભ થયો છે. દરિયાની લહેરોની વચ્ચે અને રેતીની સુગંધ સાથે ભારતની આ યજમાની વિશ્વભરમાં એક અલગ જ છાપ છોડી રહી છે.

પુરીનો આ કિનારો આજે માત્ર એક પ્રવાસન સ્થળ નથી રહ્યો, પરંતુ તે આંતરરાષ્ટ્રીય મિત્રતા અને શાંતિના સંદેશનો એક જીવંત મંચ બની ગયો છે.