જીનીવા: તાજેતરમાં એક લક્ઝરી ક્રૂઝ શિપ પર હંટાવાયરસના આઉટબ્રેકને કારણે ૩ મુસાફરોના કરૂણ મોત થયા છે અને અન્ય ૫ કેસ શંકાસ્પદ જણાતા સમગ્ર વિશ્વમાં ખળભળાટ મચી ગયો છે. વર્લ્ડ હેલ્થ ઓર્ગેનાઈઝેશન (WHO) મુજબ, વિશ્વભરમાં દર વર્ષે ૧૦,૦૦૦ થી ૧,૦૦,૦૦૦ જેટલા હંટાવાયરસના કેસ નોંધાય છે. પરંતુ આ વખતે જે 'એન્ડીઝ સ્ટ્રેન' જોવા મળ્યો છે તે વધુ ચિંતાજનક છે.
કેવી રીતે ફેલાય છે આ વાયરસ?
હંટાવાયરસ મુખ્યત્વે ઉંદરો (ઉંદર અને છછૂંદર) દ્વારા ફેલાય છે. જ્યારે માણસ ઉંદરના મળ-મૂત્ર, લાળ કે તેના કરડવાથી સીધા સંપર્કમાં આવે ત્યારે ચેપ લાગે છે. ખાસ કરીને ઉંદરોવાળી જગ્યાએ સફાઈ કરતી વખતે વાયરસ હવામાં ભળે છે અને શ્વાસ દ્વારા શરીરમાં પ્રવેશે છે. જોકે, આર્જેન્ટિના અને ચિલીમાં જોવા મળતો 'એન્ડીઝ સ્ટ્રેન' એકમાત્ર એવો વાયરસ છે જે નજીકના સંપર્ક દ્વારા એક માણસથી બીજા માણસમાં ફેલાઈ શકે છે. ક્રૂઝ શિપ પર પણ આ જ ખતરનાક સ્ટ્રેન હોવાની પુષ્ટિ થઈ છે.
લક્ષણો અને જીવલેણ ખતરો
આ વાયરસના લક્ષણો ચેપ લાગ્યાના ૧ થી ૮ અઠવાડિયા પછી દેખાવા લાગે છે. જેમાં તીવ્ર તાવ, માંસપેશીઓમાં દુખાવો અને ગેસ્ટ્રોની સમસ્યા મુખ્ય છે.
•    એશિયા અને યુરોપમાં: આ વાયરસ કિડની અને રક્તવાહિનીઓ પર અસર કરે છે, જ્યાં મૃત્યુદર ૧-૧૫% છે.
•    અમેરિકામાં: અહીં આ વાયરસ હૃદય અને ફેફસાં પર હુમલો કરે છે, જેના કારણે ફેફસામાં પાણી ભરાઈ જાય છે. આ સ્થિતિમાં મૃત્યુદર ૫૦% જેટલો ઊંચો હોઈ શકે છે.
શું તેની કોઈ સારવાર છે?
હાલમાં હંટાવાયરસ માટે કોઈ ચોક્કસ દવા કે રસી ઉપલબ્ધ નથી. દર્દીને હોસ્પિટલમાં દાખલ કરી સપોર્ટિવ કેર અને વેન્ટિલેટરની મદદથી સારવાર આપવામાં આવે છે. આ રોગથી બચવાનો એક જ રસ્તો છે - ઉંદરોથી અંતર રાખવું અને રહેણાંક વિસ્તારોમાં સફાઈ રાખવી. WHO નું કહેવું છે કે જોકે સામાન્ય જનતા માટે હાલમાં જોખમ ઓછું છે, પરંતુ બોલિવિયા, પેરાગ્વે અને આર્જેન્ટિના જેવા દેશોમાં તેના કેસ અને મૃત્યુદરમાં સતત વધારો થઈ રહ્યો છે.