લોકપ્રિય મેસેજિંગ એપ WhatsApp હવે ભારતમાં નવા પ્રીમિયમ સબ્સ્ક્રિપ્શન પ્લાન સાથે ઉપલબ્ધ બની રહી છે. Meta દ્વારા શરૂ કરાયેલ 'WhatsApp Plus' સેવા એવા યુઝર્સ માટે છે, જેઓ એપમાં વધુ કસ્ટમાઇઝેશન અને વધારાના ચેટ મેનેજમેન્ટ વિકલ્પો ઇચ્છે છે. આ સબ્સ્ક્રિપ્શન માટે દર મહિને 79 ચૂકવવાના રહેશે, જ્યારે નવા યુઝર્સને એક મહિનાની મફત ટ્રાયલ પણ આપવામાં આવી રહી છે. કંપની આ સુવિધાને તબક્કાવાર રીતે ભારતીય યુઝર્સ  સુધી પહોંચાડી રહી છે.

WhatsApp Plus સક્રિય કરવા માટે સૌપ્રથમ એપને અપડેટ કરો. ત્યારબાદ WhatsApp ખોલીને ઉપર જમણી બાજુ આવેલા ત્રણ ડોટ્સ પર ક્લિક કરો અને Settingsમાં જાઓ. જો તમારા એકાઉન્ટમાં સુવિધા ઉપલબ્ધ હશે તો ત્યાં 'Subscriptions' નામનો નવો વિકલ્પ દેખાશે. તેના પર ક્લિક કરીને WhatsApp Plus પસંદ કરો અને મફત ટ્રાયલ શરૂ કરી શકો છો. Metaના જણાવ્યા મુજબ, આ સુવિધા તમામ યુઝર્સ સુધી એકસાથે નહીં પરંતુ તબક્કાવાર પહોંચાડવામાં આવી રહી છે.

WhatsApp Plus સબ્સ્ક્રાઇબર્સને કસ્ટમ એપ આઇકોન, નવી થીમ્સ, પ્રીમિયમ સ્ટીકર્સ, ખાસ રિંગટોન્સ અને વધુ ચેટ્સ પિન કરવાની સુવિધા મળશે. ઉપરાંત, કસ્ટમ ચેટ લિસ્ટ, વધારાના પર્સનલાઇઝેશન વિકલ્પો અને કેટલાક યુઝર્સ માટે AI જનરેટેડ ઇમોજી જેવી સુવિધાઓ પણ ઉપલબ્ધ થઈ શકે છે. આ તમામ ફીચર્સનો મુખ્ય ઉદ્દેશ WhatsAppને વધુ વ્યક્તિગત અને આકર્ષક બનાવવાનો છે.

Metaએ સ્પષ્ટ કર્યું છે કે WhatsApp Plus સંપૂર્ણપણે વૈકલ્પિક સેવા છે. સામાન્ય WhatsApp યુઝર્સ માટે મેસેજિંગ, વોઇસ કોલ, વીડિયો કોલ અને એન્ડ-ટુ-એન્ડ એન્ક્રિપ્શન જેવી મુખ્ય સેવાઓ અગાઉની જેમ મફત જ રહેશે. WhatsApp Plus મુખ્યત્વે દેખાવ અને ચેટ મેનેજમેન્ટ સંબંધિત સુવિધાઓ પર કેન્દ્રિત છે. એટલે કે, સબ્સ્ક્રિપ્શન ન લેતા યુઝર્સના રોજિંદા WhatsApp અનુભવ પર કોઈ અસર નહીં પડે.