કેલિફોર્નિયા :  જો તમે આઈફોન પર વોટ્સએપનો ઉપયોગ કરો છો, તો તમારા માટે એક ઉત્સાહજનક સમાચાર સામે આવ્યા છે. કંપની પોતાના યુઝર ઈન્ટરફેસ  ને એકદમ નવો, તાજો અને આકર્ષક લુક આપવાની તૈયારી કરી રહી છે. આ આગામી અપડેટ બાદ તમારી ચેટ સ્ક્રીન સંપૂર્ણપણે બદલાઈ જશે, જેનાથી સામાન્ય મેસેજ મોકલવાથી લઈને ફોટા અને વીડિયો શેર કરવાનો અનુભવ વધુ સ્મૂધ અને પ્રીમિયમ બની જશે.

નવા લુકમાં સૌથી મોટો અને દૃશ્યમાન ફેરફાર મેસેજ બબલ્સની ડિઝાઇનમાં કરવામાં આવ્યો છે. પહેલાં કરતાં વધુ રાઉન્ડેડ  અને સોફ્ટ એજ ધરાવતા આ બબલ્સ ચેટિંગ સ્ક્રીનને અત્યંત મોડર્ન અને નીટ લુક આપે છે. આ ઉપરાંત, મીડિયા શેરિંગમાં પણ મોટો સુધારો કરાયો છે; હવે ચેટમાં મોકલેલા ફોટા, વીડિયો કે GIF ની આસપાસની બોર્ડર્સ સંપૂર્ણપણે હટાવી દેવાશે. આ બોર્ડરલેસ ડિઝાઇનને કારણે ઇમેજ અને વીડિયો સ્ક્રીન પર વધુ મોટા, સ્પષ્ટ અને દ્રશ્યમાન લાગશે.

વોટ્સએપના આ નવા લુકની પ્રથમ ઝલક iOS માટેના બીટા વર્ઝન (26.18.10.71) માં જોવા મળી છે. હાલમાં આ ફીચર માત્ર અમુક પસંદગીના બીટા ટેસ્ટર્સ માટે જ ઉપલબ્ધ કરાવવામાં આવ્યું છે, જ્યાં તેનું સઘન પરીક્ષણ ચાલી રહ્યું છે. ફીડબેક અને જરૂરી સુધારાઓ પૂર્ણ થયા બાદ ટૂંક સમયમાં જ તમામ સામાન્ય iPhone યુઝર્સ માટે આ સ્ટેબલ અપડેટ વૈશ્વિક સ્તરે રોલઆઉટ કરવામાં આવશે.