વોશિંગ્ટન, તા. 8 : વ્હાઇટ હાઉસ અમેરિકામાં વિદેશી વિદ્યાર્થીઓના F-1 વિઝા પર મોટા ફેરફારની તૈયારી કરી રહ્યું છે. ડિપાર્ટમેન્ટ ઓફ હોમલેન્ડ સિક્યુરિટી (DHS)એ પ્રસ્તાવિત કરેલા નવા નિયમ હેઠળ હાલની "ડ્યુરેશન ઓફ સ્ટેટસ" સિસ્ટમ ખતમ કરીને વિદેશી વિદ્યાર્થીઓના રોકાણ પર ચાર વર્ષની ફિક્સ્ડ મર્યાદા મૂકવામાં આવશે. આ દરખાસ્ત હાલ વ્હાઇટ હાઉસના ઓફિસ ઓફ મેનેજમેન્ટ એન્ડ બજેટ (OMB)માં સમીક્ષા હેઠળ છે. 0155

 

શું છે નવો પ્રસ્તાવ?

 

 

હાલ F-1 વિઝા ધારક વિદ્યાર્થીઓ જ્યાં સુધી ફુલ-ટાઇમ અભ્યાસમાં નોંધાયેલા હોય ત્યાં સુધી અમેરિકામાં રહી શકે છે. નવા નિયમ મુજબ F-1 વિઝા ધારકોને વધુમાં વધુ ચાર વર્ષ માટે જ અમેરિકામાં રહેવાની મંજૂરી મળશે. ત્યારબાદ સ્ટેટસ લંબાવવા માટે DHSમાં અરજી કરવી પડશે. આ જ નિયમ J-1 એક્સચેન્જ વિઝિટર વિઝા ધારકો પર પણ લાગુ પડશે. વિદેશી મીડિયા પ્રતિનિધિઓ માટે I વિઝાની મુદત 240 દિવસની કરવામાં આવશે, જ્યારે ચીની નાગરિકો માટે માત્ર 90 દિવસની મર્યાદા રહેશે.

 

DHSનો તર્ક શું છે?

 

DHSનું કહેવું છે કે "ખૂબ લાંબા સમયથી વિદેશી વિદ્યાર્થીઓ અને અન્ય વિઝા ધારકોને અમેરિકામાં વર્ચ્યુઅલ રીતે અનિશ્ચિત સમય સુધી રહેવાની મંજૂરી આપવામાં આવી છે, જે સુરક્ષા જોખમ ઊભું કરે છે, કરદાતાઓના અબજો ડોલર ખર્ચે છે અને અમેરિકી નાગરિકોને ગેરલાભ કરાવે છે". DHSનો આરોપ છે કે વિદેશી વિદ્યાર્થીઓ "ફોરએવર સ્ટુડન્ટ્સ" બનીને કાયમ ઉચ્ચ શિક્ષણના કોર્સમાં નોંધાઈને અમેરિકામાં રોકાઈ જાય છે. 

 

*કેટલા વિદ્યાર્થીઓને અસર?*

2024માં અમેરિકામાં F વિઝા પર લગભગ 16 લાખ આંતરરાષ્ટ્રીય વિદ્યાર્થીઓ હતા. 11 લાખથી વધુ વિદ્યાર્થીઓ બેચલર અથવા માસ્ટર ડિગ્રીમાં નોંધાયેલા હતા, જ્યારે લગભગ 2.15 લાખ વિદ્યાર્થીઓ ડોક્ટરલ ડિગ્રી કરી રહ્યા હતા. ચાર વર્ષની મર્યાદાથી PhD અને રિસર્ચ પ્રોગ્રામ કરતા વિદ્યાર્થીઓને સૌથી વધુ અસર થશે, કારણ કે આ પ્રોગ્રામ સામાન્ય રીતે 5-6 વર્ષ ચાલે છે. ગ્રેજ્યુએશન પછી OPT માટે 60 દિવસનો ગ્રેસ પીરિયડ ઘટાડીને 30 દિવસ કરવાનો પ્રસ્તાવ પણ છે.

 

 

વિરોધ અને સ્થિતિ

 

 

આ પ્રસ્તાવ પહેલીવાર 2020માં ટ્રમ્પ વહીવટીતંત્ર દરમિયાન રજૂ થયો હતો, જેનો યુનિવર્સિટીઓ અને NAFSA જેવી સંસ્થાઓએ વિરોધ કર્યો હતો. બાઇડન વહીવટીતંત્રે 2021માં તેને પાછો ખેંચી લીધો હતો. DHSએ 28 ઓગસ્ટ 2025ના રોજ ફરી આ નિયમ પ્રસ્તાવિત કર્યો છે, પરંતુ 7 મે 2026 સુધી તે અંતિમ નથી અને અમલમાં આવ્યો નથી. 

 

વિદેશી વિદ્યાર્થીઓ અમેરિકી અર્થતંત્રમાં વાર્ષિક લગભગ $50 બિલિયનનું યોગદાન આપે છે. નિષ્ણાતોનું માનવું છે કે આ નિયમથી વહીવટી બોજ વધશે, વિદ્યાર્થીઓની શૈક્ષણિક પ્રગતિ ખોરવાશે અને અમેરિકા પ્રતિભાશાળી વિદ્યાર્થીઓ ગુમાવી શકે છે.