નવી દિલ્હી:ભારતીય રેલવે દ્વારા એસી કોચમાં મુસાફરી કરતા પ્રવાસીઓને બે ચાદર આપવા પાછળનું અસલી કારણ સંસદમાં સત્તાવાર રીતે સ્પષ્ટ કરવામાં આવ્યું છે, જે મુજબ એક ચાદર સીટ પર પાથરવા માટે અને બીજી ચાદર ધાબળાના બદલે ઓઢવા માટે હોય છે જેથી ધાબળો શરીરના સીધા સંપર્કમાં ન આવે.

રેલવેના નિયમો અનુસાર દરેક સફર પછી ચાદર, ઓશીકાના કવર અને ટુવાલ તાત્કાલિક ધોવામાં આવે છે, જ્યારે ઊનના ધાબળા મહિનામાં એક થી બે વખત ધોવાય છે અને દર બે વર્ષે નવા બદલવામાં આવે છે.

યાત્રીરોના સ્વાસ્થ્ય અને સ્વચ્છતાને પ્રાથમિકતા આપીને રેલવે હવે કેટલીક વંદે ભારત અને પ્રીમિયમ ટ્રેનોમાં ધાબળા માટે વિશેષ કવરની આધુનિક વ્યવસ્થા પણ લાગુ કરી રહી છે જેથી વધારાની ચાદરની ઝંઝટમાંથી છુટકારો મળે.

આ ઉપરાંત, આરટીઆઈના તાજેતરના અહેવાલો મુજબ જાન્યુઆરી ૨૦૨૨થી મે ૨૦૨૬ દરમિયાન ટ્રેનોમાંથી ૧.૨૭ કરોડ જેટલા બેડરોલની ચોરી થવાથી કોન્ટ્રાક્ટરોને કરોડો રૂપિયાનું આર્થિક નુકસાન વેઠવું પડ્યું છે.

ચોરાયેલી વસ્તુઓમાં લાખોની સંખ્યામાં ફેસ ટુવાલ, ચાદરો, ઓશીકાના કવર અને ધાબળા સામેલ છે, જેના કારણે રેલવે પ્રશાસન દ્વારા મુસાફરોની સુરક્ષા અને સામાનની જાળવણી માટે કડક પગલાં લેવામાં આવી રહ્યા છે.

આ મામલે રેલવે તંત્ર દ્વારા ભવિષ્યમાં બેડરોલની સુરક્ષા વધારવા અને પ્રવાસીઓને વધુ સારી સુવિધાઓ પૂરી પાડવા માટે નવીન ટેકનોલોજી અને પદ્ધતિઓ અપનાવવાની દિશામાં કામગીરી ચાલી રહી છે.