નવી દિલ્હી : અમેરિકાના વિદેશ મંત્રી માર્કો રુબિયો પોતાની પ્રથમ સત્તાવાર મુલાકાતે પત્ની જેનેટ ડી. રુબિયો સાથે ભારત પહોંચ્યા ત્યારે જ એક અભૂતપૂર્વ રાજદ્વારી સોશિયલ મીડિયા વોર છેડાઈ ગયું છે. રુબિયોએ પ્લેનમાંથી ઉતરતાની સાથે જ સોશિયલ મીડિયા પ્લેટફોર્મ X પર પોસ્ટ કર્યું કે, "હું ભારતમાં પહોંચી ગયો છું. એક અદ્ભુત પ્રવાસની રાહ જોઈ રહ્યો છું!" આ સાદી પોસ્ટ પર મુંબઈ સ્થિત ઈરાની કોન્સ્યુલેટે તાત્કાલિક રીટ્વીટ કરીને હિન્દીમાં આકરો પ્રહાર કર્યો હતો: "થોડું શીખો, મિત્ર... તમને સભ્યતાનો મફતમાં ક્રેશ કોર્સ મળશે!"

ઈરાનની આ રહસ્યમય અને તીખી ટિપ્પણી પાછળ તાજેતરમાં અમેરિકા અને ઈરાન વચ્ચે ચરમસીમાએ પહોંચેલો તણાવ જવાબદાર છે. હકીકતમાં, એપ્રિલ મહિનામાં યુએસ પ્રમુખ ડોનાલ્ડ ટ્રમ્પે હોર્મુઝ સ્ટ્રેટના વિવાદ પર ઈરાનને ચેતવણી આપતા સોશિયલ મીડિયા પર લખ્યું હતું કે જો ઈરાન શાંતિ કરાર નહીં કરે તો "આજે રાત્રે એક સંપૂર્ણ સભ્યતાનો અંત આવશે." ટ્રમ્પના આ જ 'સભ્યતાના અંત' વાળા નિવેદનનો હિસાબ ચુકવતા ઈરાને હવે ભારતીય સંસ્કૃતિના સંદર્ભે રુબિયોને ટોણો માર્યો છે કે તેઓ ભારત આવ્યા છે તો અહીંથી થોડી 'સભ્યતા' (નમ્રતા અને સંસ્કૃતિ) શીખીને જાય.

આ ટ્વિટર વોર વચ્ચે વિદેશ મંત્રી માર્કો રુબિયોએ નવી દિલ્હીમાં વડા પ્રધાન નરેન્દ્ર મોદી સાથે ઉચ્ચ સ્તરીય બેઠક યોજી હતી. પીએમ મોદીએ આ મુલાકાત અંગે ખુશી વ્યક્ત કરતા જણાવ્યું કે, ભારત-અમેરિકા વૈશ્વિક વ્યૂહાત્મક ભાગીદારી, પ્રાદેશિક સુરક્ષા અને વૈશ્વિક શાંતિના મુદ્દાઓ પર સકારાત્મક ચર્ચા થઈ છે. એક તરફ ભારત અને અમેરિકા પોતાના દ્વિપક્ષીય સંબંધો સુધારવાનો પ્રયાસ કરી રહ્યા છે, ત્યારે ઈરાનનો આ સોશિયલ મીડિયા એટેક વૈશ્વિક રાજકારણમાં ભારે ચર્ચાનો વિષય બન્યો છે.