મુંબઈ : કોઈપણ વિદેશી નાગરિક માટે ભારત આવીને વસવું એ એક નવો સાંસ્કૃતિક અનુભવ હોય છે, પરંતુ જ્યારે વાત બાળકના ઉછેરની (Parenting) આવે ત્યારે પૂર્વ અને પશ્ચિમના દેશો વચ્ચે આકાશ-પાતાળનો તફાવત જોવા મળે છે. આર્થિક અને સામાજિક રીતે અત્યંત વિકસિત ગણાતા યુરોપના નેધરલેન્ડ્સથી આવીને છેલ્લા ૯ વર્ષથી મુંબઈમાં સ્થાયી થયેલી એક ડચ માતા ઇવાનાએ પોતાનો રસપ્રદ અનુભવ સોશિયલ મીડિયા પર શેર કર્યો છે. તેની દીકરીના બીજા જન્મદિવસે ભારતમાં બાળકના ઉછેર અને નેધરલેન્ડ્સની જીવનશૈલી વચ્ચેની સાત એવી બાબતો પર પ્રકાશ પાડ્યો છે, જેણે તેને ભારતીય સંસ્કૃતિની પ્રશંસા કરવા મજબૂર કરી દીધી છે.
ઇવાનાએ જણાવ્યું કે, "ભારતમાં આટલા વર્ષો વિતાવ્યા પછી મને સમજાયું છે કે કોઈ દેશની પદ્ધતિ ‘સારી’ કે ‘ખરાબ’ નથી હોતી, પરંતુ વસ્તુઓને અલગ દ્રષ્ટિકોણથી જોવાની અને સ્વીકારવાની એક કળા છે." તેના મતે યુરોપ અને ભારતના કૌટુંબિક માળખામાં જમીન-આસમાનનો ફેર છે જે બાળકના માનસિક વિકાસ પર મોટી અસર કરે છે.
મુંબઈમાં આખું 'ગામ' સાથે મળીને બાળક ઉછેરે છે
ઇવાનાએ પશ્ચિમી દેશોની સરખામણી કરતા જણાવ્યું કે, નેધરલેન્ડ્સમાં વાલીપણું ખૂબ જ સંગઠિત અને વ્યવસ્થિત હોય છે, પરંતુ ત્યાં માતા-પિતા એકલા પડી જતા હોય છે. ત્યાં બાળકની તમામ જવાબદારીઓ માતા-પિતાએ પોતે જ સંભાળવી પડે છે, જેનાથી એકલતા અને સ્ટ્રેસ વધે છે. જ્યારે આનાથી વિપરીત મુંબઈમાં તેને એક અનોખો અને સહિયારો (Community) અભિગમ જોવા મળ્યો. તેણે ભાવુક થઈને લખ્યું કે, "મુંબઈમાં ‘ઇટ્સ ટેક્સ એ વિલેજ ટુ રેઇઝ એ ચાઇલ્ડ’ (એક બાળકને ઉછેરવા આખા ગામની જરૂર પડે છે) વાળી કહેવત હકીકત છે. અહીં તમારી સોસાયટી, પડોશીઓ, પરિવાર અને કામવાળા લોકોથી લઈને આખું એક નેટવર્ક તૈયાર હોય છે, જેમાંથી કોઈને કોઈ હંમેશા બાળકની દેખરેખ રાખવા, તેની સાથે રમવા કે તમારી મદદ કરવા તૈયાર બેઠું હોય છે." શરૂઆતમાં વધુ પડતી સ્વતંત્રતાની ટેવાયેલી ઇવાના માટે આ વાતાવરણ નવું હતું, પણ ધીમે-ધીમે તેને આ આપવાપણું અને પ્રેમ ખૂબ જ ગમી ગયા.
જાહેર સ્થળોએ બાળકોનો અદભુત સ્વીકાર
બીજો સૌથી મોટો તફાવત ઇવાનાએ એ નોંધ્યો કે ભારતમાં બાળકોને સામાજિક જીવનનો એક મહત્વનો હિસ્સો ગણવામાં આવે છે. પશ્ચિમી દેશોમાં ઘણી એવી જગ્યાઓ કે રેસ્ટોરન્ટ્સ હોય છે જ્યાં નાના બાળકોને લાવવા પર પ્રતિબંધ હોય છે અથવા ત્યાંનું વાતાવરણ બાળકો માટે અનુકૂળ નથી હોતું. જ્યારે ભારતમાં સ્થિતિ તદ્દન અલગ છે. અહીં લગ્નપ્રસંગો, હોટલો, મોલ કે કોઈપણ જાહેર સ્થળોએ બાળકોનું ખુલ્લા દિલથી સ્વાગત કરવામાં આવે છે. બાળકોને કોઈપણ રોકટોક વિના દરેક જગ્યાએ સામેલ કરવામાં આવે છે, જેના કારણે પરિવારો કોઈપણ માનસિક તણાવ વિના મુક્તપણે બહાર હરી-ફરી શકે છે અને માણી શકે છે. ઇવાનાની આ પોસ્ટ હાલ ઇન્ટરનેટ પર ભારે ધૂમ મચાવી રહી છે અને લોકો ભારતીય કૌટુંબિક ભાવના પર ગર્વ વ્યક્ત કરી રહ્યા છે.
🇳🇱 vs 🇮🇳 વાલીપણાના મુખ્ય તફાવતો:
•    કૌટુંબિક સપોર્ટ: નેધરલેન્ડ્સમાં બધી જવાબદારી એકલા મા-બાપની, જ્યારે ભારતમાં આખો સમાજ પડખે ઊભો રહે છે.
•    સામાજિક સ્વીકાર: યુરોપમાં બાળકો માટે મર્યાદિત એન્ટ્રી, ભારતમાં દરેક જગ્યાએ બાળકોનું સન્માનભેર સ્વાગત.
•    જીવનશૈલી: પશ્ચિમમાં આત્મનિર્ભર અને વ્યક્તિગત ઉછેર, ભારતમાં સામૂહિક અને સંસ્કારોનં  સિંચન કરતું વાતાવરણ.