નવી દિલ્હી: સુપ્રીમ કોર્ટમાં દરરોજ સેંકડો કેસોની સુનાવણી થાય છે, પરંતુ શુક્રવારે એક એવો કિસ્સો સામે આવ્યો જેમાં જજની રમૂજી છતાં વાસ્તવિકતાથી ભરેલી ટિપ્પણીએ સૌનું ધ્યાન ખેંચ્યું હતું. એક છૂટાછેડાના કેસની સુનાવણી દરમિયાન સુપ્રીમ કોર્ટે નિરીક્ષણ કર્યું કે, જેવી છૂટાછેડાની કાર્યવાહી શરૂ થાય છે, તરત જ બંને પક્ષો અચાનક પોતાની જાતને બેરોજગાર ગણાવવા લાગે છે.
શું હતો સમગ્ર મામલો?
બાર એન્ડ બેન્ચના અહેવાલ મુજબ, એક સોફ્ટવેર એન્જિનિયર પતિ અને તેની પત્ની વચ્ચે છૂટાછેડાનો કેસ સુપ્રીમ કોર્ટ સુધી પહોંચ્યો હતો. પતિએ દલીલ કરી હતી કે તે છૂટાછેડા લેવા માંગતો નથી. જ્યારે કોર્ટે પૂછ્યું કે તેના પર કયા આધારે કેસ થયો છે, ત્યારે જાણવા મળ્યું કે પતિએ પત્ની પર વ્યભિચારના ખોટા આરોપો લગાવ્યા હતા જે તે સાબિત કરી શક્યો નહોતો. કોર્ટે સ્પષ્ટ કહ્યું કે, પત્ની પર ચારિત્ર્યના ખોટા આક્ષેપો કરવા એ જ છૂટાછેડા માટેનો મોટો આધાર બની જાય છે.
બેરોજગારી પર કોર્ટનો કટાક્ષ
સુનાવણી દરમિયાન જ્યારે કોર્ટે પતિને તેની નોકરી વિશે પૂછ્યું, ત્યારે તેણે જવાબ આપ્યો, "હું હવે માત્ર એક ફ્રીલાન્સર છું." આ સાંભળીને જસ્ટિસે કટાક્ષ કરતા કહ્યું, "ભારતમાં આ એક આશ્ચર્યજનક ટ્રેન્ડ છે. છૂટાછેડાનો કેસ શરૂ થાય એટલે કાં તો પતિ નોકરી છોડી દે છે, કાં તો પત્ની રાજીનામું આપી દે છે અથવા પત્નીની ફરિયાદ પર પતિને કાઢી મૂકવામાં આવે છે. ટૂંકમાં, બધા જ રાતોરાત બેરોજગાર બની જાય છે!"
પત્નીએ ના માંગી તો પણ ૫૦ લાખનું ભરણપોષણ
આ કેસમાં સૌથી વધુ આશ્ચર્ય ત્યારે સર્જાયું જ્યારે કોર્ટે પતિને આદેશ આપ્યો કે તેણે પત્નીને ૫૦ લાખ રૂપિયા ભરણપોષણ (Alimony) પેટે આપવા પડશે. પતિએ દલીલ કરી કે પત્નીએ પોતે આ રકમ માંગી નથી. ત્યારે કોર્ટે મક્કમતાથી કહ્યું, "ભલે તેણે ના માંગી હોય, પણ અમે કહી રહ્યા છીએ કે તમારે આ રકમ ચૂકવવી પડશે."
બાળકની કસ્ટડીનો મુદ્દો પણ ફગાવ્યો
પતિએ છેલ્લે વિનંતી કરી કે બાળકની કસ્ટડી માટે મધ્યસ્થી (Mediation) નો રસ્તો કાઢવામાં આવે, પરંતુ કોર્ટે તે વાત પણ ફગાવી દીધી હતી. પત્નીએ કોર્ટને જણાવ્યું હતું કે હાઈકોર્ટના ચુકાદા બાદ તેણે બીજા લગ્ન કરી લીધા છે, તેથી હવે સાથે રહેવાનો કોઈ પ્રશ્ન જ ઊભો થતો નથી. સુપ્રીમ કોર્ટની આ ટિપ્પણી અત્યારે સોશિયલ મીડિયા પર અને કાનૂની જગતમાં ખૂબ ચર્ચાઈ રહી છે.