હૈદરાબાદઃ તેલંગાણાના કામારેડ્ડી જિલ્લામાં લગ્નેતર સંબંધોના કારણે હત્યાનો ચોંકાવનારો કિસ્સો સામે આવ્યો છે. 25 વર્ષીય મહિલાએ પોતાના બે પ્રેમીઓ સાથે મળીને પતિની હત્યાનું કથિત કાવતરું ઘડ્યું હતું. જોકે, પોલીસ તપાસમાં સમગ્ર ઘટનાનો પર્દાફાશ થતાં પત્ની સહિત ત્રણેય આરોપીઓની ધરપકડ કરવામાં આવી છે.

મૃતકની ઓળખ 26 વર્ષીય ગુમ્માડી કાશીરામ તરીકે થઈ છે. તે બાંસવાડા મંડળના હનમાજીપેટ ગામનો રહેવાસી હતો અને દૈનિક મજૂરી કરીને પરિવારનું ગુજરાન ચલાવતો હતો.

પોલીસના જણાવ્યા અનુસાર, કાશીરામની પત્ની ગુમ્માડી સવિતાને ગામના જ ચિંતાકિન્ડી રામુ અને પસુપુલા સંતોષ સાથે કથિત પ્રેમસંબંધો હતા. આ સંબંધોમાં પતિ અડચણરૂપ બનતો હોવાનું માની ત્રણેયે તેની હત્યાનું કાવતરું ઘડ્યું હતું.

યોજનાના ભાગરૂપે 23 ઓક્ટોબરની રાત્રે ત્રણેય કાશીરામને દારૂ પીવાના બહાને બહાર લઈ ગયા હતા. કાશીરામ નશામાં ધૂત થયા બાદ રામુએ નાયલોનની દોરીથી તેનું ગળું દબાવ્યું હતું, જ્યારે સંતોષે તેના હાથ પકડી રાખ્યા હતા.

હત્યા કર્યા બાદ આરોપીઓએ મૃતદેહને ગામની બહાર આવેલા પચેરા ચેરુવુ તળાવમાં ફેંકી દીધો હતો, જેથી ઘટનાને અકસ્માતનું સ્વરૂપ આપી શકાય. 23 ઓક્ટોબરની રાત્રે તળાવમાંથી કાશીરામનો મૃતદેહ મળી આવ્યો હતો.

શરૂઆતમાં પોલીસે શંકાસ્પદ મોતનો ગુનો નોંધ્યો હતો. જોકે, પોસ્ટમોર્ટમના પ્રાથમિક અહેવાલ અને અન્ય પુરાવાઓના આધારે આ હત્યાનો બનાવ હોવાનું સામે આવ્યું હતું.

પોલીસે ટેક્નિકલ પુરાવા અને સાક્ષીઓની પૂછપરછના આધારે 30 ઓક્ટોબરે પત્ની સવિતા સહિત રામુ અને સંતોષની ધરપકડ કરી હતી. આરોપીઓ પાસેથી મોબાઇલ ફોન અને અન્ય સામગ્રી પણ જપ્ત કરવામાં આવી છે.

ત્રણેય આરોપીઓ સામે ભારતીય ન્યાય સંહિતાની કલમ 103, 238 અને 3(5) હેઠળ ગુનો નોંધવામાં આવ્યો છે. તેમને કોર્ટમાં રજૂ કરતાં ન્યાયિક રિમાન્ડ પર મોકલવામાં આવ્યા છે.