મથુરા, તા.૦૭: લગ્નજીવનમાં પતિ-પત્ની વચ્ચેનો પ્રેમ અને મીઠો ઝઘડો એ બહુ સામાન્ય બાબત છે, પરંતુ ઘણીવાર પત્નીનો ગુસ્સો શાંત કરવો એ પતિઓ માટે દુનિયાનું સૌથી અઘરું કામ બની જાય છે. સોશિયલ મીડિયા પર પોતાના પ્રવચનો અને સચોટ માર્ગદર્શન માટે જાણીતા રાધારાણીના પરમ ભક્ત પૂજ્ય પ્રેમાનંદ જી મહારાજ પાસે તાજેતરમાં જ એક વ્યક્તિ આવો જ એક રસપ્રદ સવાલ લઈને પહોંચ્યો હતો. આ પુરુષે પૂછ્યું, "મહારાજ જી, જો પત્ની વારંવાર ગુસ્સે થતી હોય, તો તેને ખુશ રાખવા માટેનો કોઈ ખાસ 'ચમત્કારિક મંત્ર' છે?" મહારાજજીએ આ સવાલનો જે માર્મિક અને વહેવારુ જવાબ આપ્યો, તે દરેક પતિ માટે આંખ ઉઘાડનારો સાબિત થયો છે.
પત્નીનું દિલ જીતવાનો અસલી મંત્ર: 'ઈચ્છાનો આદર'
મહારાજજીએ હસતા હસતા ખૂબ જ સરળ શબ્દોમાં કહ્યું કે, તેઓ કોઈ સંસારિક વિષયોના નિષ્ણાત નથી, પરંતુ શાસ્ત્રોના આધારે એક સચોટ ઉકેલ ચોક્કસ આપી શકે છે. તેમણે સ્પષ્ટ કર્યું કે પત્નીને ખુશ રાખવા માટે દુનિયામાં કોઈ જાદુઈ કે ગોખેલો મંત્ર કામ નથી આવતો. પત્નીનું હૃદય જીતવાનો સાચો મંત્ર એ છે કે પતિએ હંમેશા તેની પત્નીની ઈચ્છાઓ અને લાગણીઓનો આદર કરવો જોઈએ. જો એક પતિ પોતાની પત્નીની ખુશીઓનું ધ્યાન રાખે અને તેની ઈચ્છા વિરુદ્ધ કોઈ ખોટું કામ ન કરે, તો ઘરમાં ક્યારેય કલેશ થતો નથી.
"પરસ્ત્રીથી અંતર" - સુખી સંસારની સૌથી પહેલી શરત
આ સલાહની સાથે પ્રેમાનંદ મહારાજે એક અત્યંત ગંભીર અને મહત્વપૂર્ણ શરત પર ભાર મૂક્યો હતો. તેમણે કહ્યું કે, દુનિયાની કોઈ પણ પત્ની પોતાના પતિના જીવનમાં બીજી કોઈ સ્ત્રીની હાજરી ક્યારેય સહન કરી શકતી નથી. જો તમે તમારી પત્નીને બધી જ ભૌતિક સુખ-સુવિધાઓ આપો, તેની દરેક નાની-મોટી ઈચ્છા પૂરી કરો, પરંતુ જો તેને ખબર પડે કે તમારું કોઈ અન્ય સ્ત્રી સાથે અફેર કે સંબંધ છે, તો તે ક્યારેય ખુશ નહીં થાય અને સંસાર બરબાદ થઈ જશે. તેથી વફાદારી એ જ પત્ની માટે સૌથી મોટો પ્રેમ છે.
જ્યારે પત્ની સામે થાય, ત્યારે પતિએ શું કરવું?
સંબંધોમાં ક્યારેક એવો સમય પણ આવે છે જ્યારે પત્ની પતિની ઈચ્છા વિરુદ્ધ જાય અથવા ગુસ્સામાં કંઈક કહી દે. આવી પરિસ્થિતિનો સામનો કરવા માટે મહારાજજીએ 'બ્રહ્માસ્ત્ર' જેવો શાંત ઈલાજ આપતા કહ્યું: "બસ, ચહેરા પર એક નાનકડું સ્મિત લાવો અને એકદમ શાંત થઈ જાવ!" સામે પક્ષે ગમે તેટલો ગુસ્સો હોય, જો પતિ હસીને મૌન ધારણ કરી લે, તો ગમે તેવો મોટો વિવાદ પણ ક્ષણભરમાં શાંત થઈ જાય છે. મહારાજજીએ અંતમાં ભારપૂર્વક કહ્યું કે, આ આદર અને સહનશીલતા સિવાય પત્નીને ખુશ રાખવાનો દુનિયામાં બીજો કોઈ શોર્ટકટ કે વિશેષ મંત્ર નથી.