પેરિસ: આર્ટિફિશિયલ ઇન્ટેલિજન્સ (AI) ના કારણે આખી દુનિયામાં અત્યારે એક જ ડરનો માહોલ છે, "શું AI મારી નોકરી છીનવી લેશે?" પરંતુ આ ગભરાટ વચ્ચે ઇ-કોમર્સ જાયન્ટ એમેઝોનના સ્થાપક જેફ બેઝોસે એક એવો બોલ્ડ અને આશાવાદી દાવો કર્યો છે જેણે ઉદ્યોગ જગતમાં નવી ચર્ચા છેડી દીધી છે. પેરિસમાં યોજાયેલી પ્રતિષ્ઠિત 'વિવાટેક ટેકનોલોજી કોન્ફરન્સ'માં બોલતા બેઝોસે સ્પષ્ટ કર્યું કે AI માણસોને ક્યારેય બિનજરૂરી કે નકામા નહીં બનાવે. તેમના મતે, આ ટેકનોલોજીનો અસલી હેતુ માનવ ક્ષમતાઓને મર્યાદિત કરવાનો નહીં, પરંતુ તેને સુપરચાર્જ કરવાનો છે, જેથી આપણે અત્યાર સુધી ન ઉકેલાયેલી જટિલ સમસ્યાઓને ચપટીમાં હલ કરી શકીશું.

જેફ બેઝોસનું માનવું છે કે માનવ જરૂરિયાતો અને સપનાઓનો કોઈ અંત નથી, અને AI આ સપનાઓને પૂરા કરવાનું એક શક્તિશાળી હથિયાર બનશે. હાલમાં સમય, બજેટ કે ટેકનિકલ મર્યાદાઓના કારણે જે આઈડિયાઝ માત્ર કાગળ પર રહી જાય છે, તેને AI વાસ્તવિકતામાં બદલશે. જ્યારે કોઈ કર્મચારીની ઉત્પાદકતા (Productivity) વધશે, ત્યારે નવી કંપનીઓ, નવા સંશોધનો અને આખેઆખા નવા ઉદ્યોગોનો જન્મ થશે. આનાથી બજારમાં એટલી બધી નવી નોકરીઓ અને પ્રોજેક્ટ્સ બહાર આવશે કે ભવિષ્યમાં બજારમાં લાયક કર્મચારીઓની અછત વર્તાવા લાગશે, એટલે કે કામ વધારે હશે અને કરનારા લોકો ઓછા પડી જશે.

જો કે, બીજી તરફ સામાન્ય લોકો અને કર્મચારીઓમાં આ ફેરફારને લઈને ભારે ચિંતા જોવા મળી રહી છે. અમેરિકામાં થયેલા તાજેતરના સર્વેક્ષણો દર્શાવે છે કે અડધાથી વધુ પરિવારોને પોતાની આજીવિકા ગુમાવવાનો ડર સતાવી રહ્યો છે, અને ખુદ એમેઝોન સહિતની મોટી આઈટી કંપનીઓએ તાજેતરમાં ખર્ચ ઘટાડવા માટે હજારો કર્મચારીઓની છટણી પણ કરી છે. આ વિરોધાભાસ વચ્ચે પણ બેઝોસ ભવિષ્યને લઈને સખત આશાવાદી છે. તેમણે AI ની તુલના 18મી સદીની 'ઔદ્યોગિક ક્રાંતિ' સાથે કરતા કહ્યું કે, શરૂઆતમાં ભલે આ પરિવર્તન પડકારજનક અને ડરામણું લાગે, પણ લાંબા ગાળે આ ટેકનોલોજી માનવજાત માટે આર્થિક સમૃદ્ધિ અને પ્રગતિનો એક નવો સુવર્ણ યુગ લાવશે.