નવી દિલ્હી : પશ્ચિમ એશિયામાં ઈરાન અને યુનાઇટેડ સ્ટેટ્સ (અમેરિકા) વચ્ચે ભડકેલી યુદ્ધની જ્વાળાઓના કારણે સમગ્ર વિશ્વમાં ભારે આર્થિક અસ્થિરતા અને ઇંધણની કટોકટી સર્જાઈ છે. આ વૈશ્વિક મહાસંકટની અસરો ભારતીય બજાર પર પણ દેખાવા લાગી છે. આ ગંભીર પરિસ્થિતિ વચ્ચે સોશિયલ મીડિયા પર ચાલી રહેલી 'ભારતમાં લોકડાઉન' ની અફવાઓ પર શનિવારે રાત્રે કેન્દ્રીય સંસદીય બાબતોના મંત્રી કિરેન રિજિજુએ એક ખાનગી ન્યૂઝ ચેનલ સાથેની વાતચીતમાં બહુ મોટું અને સ્પષ્ટ અપડેટ આપ્યું છે. કેન્દ્રીય મંત્રીએ દેશવાસીઓને આશ્વસ્ત કરતા જણાવ્યું છે કે, "ભારતમાં પરિસ્થિતિ હજુ એટલી બગડી નથી કે લોકડાઉન જેવા આકરા પગલાં ભરવા પડે, પરંતુ ભવિષ્યના ખરાબ સમયને અટકાવવા માટે અત્યારથી જ સાવચેતી રાખવી અનિવાર્ય છે."

પીએમ મોદીની અપીલ: પેટ્રોલ-ડીઝલ બચાવો અને ખોટા ખર્ચા ટાળો

આ અગાઉ વડાપ્રધાન નરેન્દ્ર મોદીએ દેશના નાગરિકોને સંબોધિત કરતા એક અત્યંત મહત્વપૂર્ણ અપીલ કરી હતી. પીએમ મોદીએ વૈશ્વિક તેલ સંકટને જોતા દેશવાસીઓને પેટ્રોલ, ડીઝલની બચત કરવા, બિનજરૂરી વાહનવ્યવહાર ઘટાડવા તેમજ ઘરના બિનજરૂરી આર્થિક ખર્ચાઓ પર કાપ મૂકવાની કડક સલાહ આપી છે. આ ઉપરાંત, વડાપ્રધાને આંતરરાષ્ટ્રીય તણાવના કારણે બજારમાં કોઈ અછત ન સર્જાય તે માટે નાગરિકોને ગભરાટમાં આવીને અનાજ કે ઇંધણની આડેધડ ખરીદી (Panic Buying) ન કરવા વિનંતી કરી છે. કેન્દ્રીય મંત્રી કિરેન રિજિજુ આ જ હાઈ-લેવલ નિવેદનનો સંદર્ભ આપી દેશને જાગૃત કરી રહ્યા હતા.

વેપાર માર્ગો બ્લોક થયા, ભારત પણ મુશ્કેલીમાં ઘેરાયું

કેન્દ્રીય મંત્રી રિજિજુએ વૈશ્વિક સ્થિતિની ગંભીરતા સમજાવતા કહ્યું કે, પશ્ચિમ એશિયા (મિડલ ઈસ્ટ) માં ચાલી રહેલો આ સંઘર્ષ ઘણો ભયાનક છે. આ યુદ્ધના કારણે આંતરરાષ્ટ્રીય વેપારી દરિયાઈ માર્ગો સંપૂર્ણપણે પ્રભાવિત થયા છે, જેના લીધે દુનિયાભરમાં ઉર્જા સંકટ ઘેરૂ બન્યું છે. ભારત આ તણાવ માટે ક્યાંય જવાબદાર નથી, પરંતુ એક મોટું ગ્લોબલ માર્કેટ હોવાના કારણે કમનસીબે આપણને પણ આ કટોકટીમાં ખેંચવામાં આવી રહ્યા છે. આવી સ્થિતિમાં ભારતે અન્ય દેશોની દયા પર નિર્ભર રહેવાના બદલે પોતાની જાતને સક્ષમ બનાવવી પડશે. આથી જ વડાપ્રધાને દેશહિતમાં ઈંધણ બચાવવાની આ સમયસરની હાકલ કરી છે.

વિદેશી આયાત ઘટાડવા સ્થાનિક ઉત્પાદન પર ભાર, વિપક્ષને આડે હાથ લીધો

રિજિજુએ ઉમેર્યું કે, છેલ્લા ૧૨ વર્ષથી પીએમ મોદી સતત દેશમાં સ્થાનિક ઉત્પાદન (Local Production) વધારવા અને વિદેશી આયાત પરની નિર્ભરતા ઘટાડવા માટે રાત-દિવસ કામ કરી રહ્યા છે. જો કે, ભારત હજુ પણ વિશ્વમાં ક્રૂડ ઓઇલનો બીજો સૌથી મોટો આયાતકાર દેશ હોવાથી, આ મુશ્કેલ સમયમાં આપણે આપણા નેતાની ગંભીરતાને સમજવી પડશે કારણ કે આ કોઈ સામાન્ય દિવસો નથી.

આ રાષ્ટ્રીય સંકટના સમયે કેન્દ્રીય મંત્રીએ વિપક્ષી પાર્ટીઓ પર પણ આકરા પ્રહારો કર્યા હતા. તેમણે કડક શબ્દોમાં કહ્યું કે, "જ્યારે દેશ પર આંતરરાષ્ટ્રીય દબાણ હોય અને સ્થિતિ નાજુક હોય, ત્યારે વિપક્ષે મદદ કરવાને બદલે આ ગંભીર મુદ્દાનું સસ્તું રાજકારણ શરૂ કરી દીધું છે. હું સંસદમાં પણ વિપક્ષને આ જ જવાબ આપીશ કે આવા મુશ્કેલ સમયમાં આખા દેશે રાજનીતિ ભૂલીને પોતાના વડાપ્રધાન સાથે મજબૂત રીતે ઊભા રહેવું જોઈએ. પરિસ્થિતિ સામાન્ય થાય ત્યારે તેઓ ગમે તેટલું રાજકારણ ખેલી શકે છે."