કંગના રનૌત સામાન્ય રીતે સોશિયલ મીડિયા પર ઘણી એક્ટિવ રહે છે. તે અવારનવાર સોશિયલ પ્લેટફોર્મ દ્વારા પોતાના મંતવ્યો રજૂ કરે છે. હાલમાં જ એક મીમ પેજ પર અભિનેત્રીનો ગુસ્સો ફાટી નીકળ્યો છે. મીમ પેજે અભિનેત્રી અને રાજકારણીના લગ્નની અફવા ફેલાવી હતી. તેણે પોસ્ટ શેર કરીને પોતાની નારાજગી સ્પષ્ટપણે વ્યક્ત કરતા કહ્યું કે, રાજનીતિમાં પણ મહિલાઓની ઈજ્જત નથી.

રાઘવ ચઢ્ઢાના ભાજપમાં જોડાયા બાદ સોશિયલ મીડિયા પર જાતજાતની વાતો થઈ રહી છે. આ દરમિયાન એક મીમ પેજે કંગના રનૌતની એક નકલી કોમેન્ટ પોસ્ટ કરી હતી, જેમાં લખ્યું હતું કે, ‘જો રાહુલ ગાંધી ભાજપમાં જોડાશે તો હું તેમની સાથે લગ્ન કરવા તૈયાર છું’. હવે જેવું કંગના રનૌતની નજરમાં આ પોસ્ટ આવી કે તરત જ તેણે અફવા ફેલાવનારા મીમ પેજનો ક્લાસ લીધો હતો.

કંગનાએ પોતાની પોસ્ટમાં લખ્યું કે, આ પ્રકારના ખોટા અને હલકી કક્ષાના સમાચાર ન માત્ર તેની છબીને નુકસાન પહોંચાડે છે, પરંતુ એ પણ દર્શાવે છે કે, રાજનીતિમાં મહિલાઓ પ્રત્યે સન્માનનો અભાવ છે. કંગના રનૌતે પોતાની સ્ટોરીમાં લખ્યું છે કે, ‘આ કેટલી ખરાબ વાત છે. રાજનીતિમાં પણ મહિલાઓની ઈજ્જત નથી. આવી ખોટી અફવાઓ ફેલાવનારાઓ પર શરમ આવવી જોઈએ’.

હવે બીજી તરફ કંગના રનૌતની ફિલ્મી કરિયરની વાત કરીએ તો અભિનેત્રીની ફિલ્મ ક્વીનનો સીક્વલ ચર્ચામાં છે, પરંતુ ક્વીનનો સીક્વલ નવા નામથી આવવાનો છે. અત્યારે તે પોતાની ફિલ્મની શૂટિંગમાં વ્યસ્ત છે. આ પ્રોજેક્ટને દિગ્દર્શક વિકાસ બહલ સંભાળી રહ્યા છે, જેમણે ફિલ્મના લેખન, દિગ્દર્શન અને કો-પ્રોડક્શનની જવાબદારી લીધી છે. એવું જણાવવામાં આવી રહ્યું છે કે, ફિલ્મ માટે ત્રણ મહિનાનું શૂટિંગ શેડ્યૂલ તૈયાર કરવામાં આવ્યું છે.