મોસ્કો, તા. 16: યુક્રેન સાથેના લાંબા યુદ્ધ અને પશ્ચિમી દેશોના આકરા પ્રતિબંધો વચ્ચે રશિયા અત્યારે એક ગંભીર સંકટનો સામનો કરી રહ્યું છે, અને તે છે—'શ્રમિકોની અછત'. રશિયાના કારખાનાઓ, આઈટી સેક્ટર અને વિજ્ઞાન ક્ષેત્રે કામદારોની ભારે અછત સર્જાતા હવે ક્રેમલિને વિદેશી વ્યાવસાયિકો માટે પોતાના દ્વાર ખોલ્યા છે. રશિયન વિદેશ મંત્રાલયે સોશિયલ મીડિયા પ્લેટફોર્મ X પર જાહેરાત કરી છે કે તેઓ વિદેશીઓ માટે રશિયામાં રહેવા અને કામ કરવા માટે એક નવી ‘ઓનલાઈન યોજના’ શરૂ કરી રહ્યા છે.
કેમ પડી કામદારોની ખોટ?
યુક્રેન સામેના યુદ્ધને કારણે લાખો રશિયન યુવાનો લશ્કરમાં જોડાઈ ગયા છે, જ્યારે બીજી તરફ સંરક્ષણ ઉદ્યોગોએ સિવિલિયન કંપનીઓમાંથી કુશળ કામદારોને પોતાની તરફ ખેંચી લીધા છે. આ ઉપરાંત, 2022 પછી રશિયામાં કડક રાજકીય નિયંત્રણોને કારણે હજારો રશિયન ટેલેન્ટ દેશ છોડીને પલાયન કરી ગઈ છે. આ શૂન્યાવકાશ ભરવા માટે રશિયા હવે વિદેશીઓનો સહારો લઈ રહ્યું છે.
‘ટાઈમ ટુ લિવ ઇન રશિયા’ શું છે આ ખાસ પ્રોગ્રામ?
રશિયાએ આ નવી યોજનાને "ટાઈમ ટુ લિવ ઇન રશિયા" નામ આપ્યું છે. આ કાર્યક્રમ હેઠળ રશિયન સરકાર એવા વિદેશીઓને ટાર્ગેટ કરી રહી છે જેઓ:
•    રશિયામાં માગમાં હોય તેવી વિશિષ્ટ કુશળતા ધરાવતા હોય.
•    પરંપરાગત રશિયન મૂલ્યો પ્રત્યે આદર ધરાવતા હોય.
આ યાદીમાં વૈજ્ઞાનિકો, ઉદ્યોગસાહસિકો, રમતવીરો, ક્રિએટિવ પ્રોફેશનલ્સ અને તેજસ્વી વિદ્યાર્થીઓનો સમાવેશ થાય છે. રસપ્રદ વાત એ છે કે, સફળ અરજદારોને વિઝા, બોર્ડર પ્રોસેસ અને રહેઠાણની સમસ્યાઓ ઉકેલવા માટે સરકાર તરફથી એક 'પર્સનલ મેનેજર' પણ ફાળવવામાં આવશે.
અરજી પ્રક્રિયા અને ટેકનિકલ અવરોધ
ઈચ્છુક ઉમેદવારોએ ઓનલાઈન અરજી સાથે પોતાનો સીવી (CV) સબમિટ કરવાનો રહેશે અને ત્યારબાદ ઓનલાઈન ઈન્ટરવ્યુની પ્રક્રિયામાંથી પસાર થવું પડશે. આખી પ્રક્રિયા માટે મહત્તમ 125 દિવસનો સમય નક્કી કરવામાં આવ્યો છે. જોકે, આ યોજનાના લોન્ચિંગ સાથે જ એક રમુજી છતાં ગંભીર કિસ્સો સામે આવ્યો છે; રશિયન મંત્રાલયે જે વેબસાઈટની લિંક શેર કરી હતી, તેમાં બુધવારે "Error 404 - Page Not Found" નો મેસેજ જોવા મળ્યો હતો.
શું રશિયા પશ્ચિમી દેશોના પ્રતિબંધો વચ્ચે ભારતીય અને અન્ય એશિયન દેશોના નિષ્ણાતોને પોતાની તરફ ખેંચવામાં સફળ રહેશે? તે જોવું રસપ્રદ રહેશે.