નવી દિલ્હી, તા.૨૮: વર્લ્ડ ઇકોનોમિક ફોરમ (WEF) દ્વારા વર્ષ ૨૦૨૬ માટે જારી કરવામાં આવેલા 'ટ્રાવેલ એન્ડ ટુરિઝમ ડેવલપમેન્ટ ઈન્ડેક્સ'માં ભારતે વૈશ્વિક સ્તરે એક નવો કીર્તિમાન સ્થાપિત કર્યો છે. પર્યટન માળખાગત સુવિધાઓમાં ઝડપી સુધારો, સાંસ્કૃતિક સમૃદ્ધિ અને મુસાફરી માટેના અનુકૂળ ખર્ચને કારણે ભારતે ૯ સ્થાનની મોટી છલાંગ લગાવીને ૧૧૦ દેશોની સૂચિમાં ૩૧મું સ્થાન પ્રાપ્ત કર્યું છે. આ ઈન્ડેક્સ વિશ્વ વિખ્યાત ઝ્યુરિચ ઈન્સ્યોરન્સ ગ્રુપના સહયોગથી તૈયાર કરવામાં આવ્યો છે.

રિપોર્ટ અનુસાર, વિશ્વ હેરિટેજ (સાંસ્કૃતિક સ્થળો)ની સંખ્યા અને વ્યવસાયિક મુસાફરીના સાધનોની બાબતમાં ભારત, ચીન અને મેક્સિકો સાથે વિશ્વના ટોચના ૧૦ દેશોમાં સ્થાન ધરાવે છે. વૈશ્વિક પ્રવાસન ક્ષેત્રે સૌથી ઝડપી પ્રગતિ કરનારા દેશોમાં ભારતે પોતાની મજબૂત દાવેદારી નોંધાવી છે. જોકે, અહેવાલમાં એ બાબત પર પણ પ્રકાશ પાડવામાં આવ્યો છે કે ભારતે હજુ કાર્યબળની કુશળતા (Skill Development) અને પર્યાવરણીય ટકાઉપણા (Environmental Sustainability) જેવા ક્ષેત્રોમાં વધુ સુધારો કરવાની જરૂર છે.

બીજી તરફ, વૈશ્વિક રેન્કિંગમાં જાપાન બે સ્થાન ઉપર આવીને ૨૦૨૬ના ઈન્ડેક્સમાં સમગ્ર વિશ્વમાં પ્રથમ ક્રમે પહોંચી ગયું છે. જાપાન બાદ અમેરિકા, સ્પેન, ઓસ્ટ્રેલિયા અને ફ્રાન્સ અનુક્રમે ટોચના પાંચ દેશોમાં સામેલ છે. તે સિવાય જર્મની, યુકે, ચીન, સ્વિટ્ઝર્લેન્ડ અને ઇટાલીએ પણ ટોચના ૧૦ દેશોની યાદીમાં સ્થાન જાળવી રાખ્યું છે.

WEF ના જણાવ્યા અનુસાર, વર્ષ ૨૦૨૪ થી ૨૦૨૬ વચ્ચે રોગચાળા પછીના સમયગાળામાં વૈશ્વિક પર્યટન ક્ષેત્રે સૌથી ઝડપી સુધારો જોવા મળ્યો છે અને ઈન્ડેક્સમાં સામેલ ૯૨% અર્થતંત્રોએ પોતાના સ્કોરમાં નોંધપાત્ર વધારો કર્યો છે. જોકે, વધતી જતી મોંઘવારી, પ્રવાસન ક્ષેત્રે રોકાણની અછત અને મજૂરોની અછત જેવી બાબતો હજુ પણ આ ક્ષેત્ર માટે મુખ્ય પડકારો બની રહી છે. WEFના અધિકારીઓના જણાવ્યા મુજબ, આગામી સમય માત્ર પ્રવાસીઓને આકર્ષવાનો નથી પણ સ્થાનિક સમુદાયો અને વ્યવસાયો માટે કાયમી મૂલ્ય ઊભું કરવાનો છે.