વોશિંગ્ટન : અમેરિકાની રાજધાની વોશિંગ્ટન ડીસી ફરી એકવાર હિંસાની ગંભીર ઘટનાથી હચમચી ઉઠી છે. વોશિંગ્ટન હિલ્ટન હોટલમાં આયોજિત વ્હાઇટ હાઉસ કોરેસ્પોન્ડન્ટ્સ ડિનર દરમિયાન અચાનક થયેલા ગોળીબારને કારણે વૈશ્વિક નેતાઓના જીવ તાળવે ચોંટ્યા હતા. આ હાઈ-પ્રોફાઈલ કાર્યક્રમમાં રાષ્ટ્રપ્રમુખ ડોનાલ્ડ ટ્રમ્પ, ફર્સ્ટ લેડી અને ઉપરાષ્ટ્રપતિ સહિતના દિગ્ગજોની હાજરી હતી. ગોળીબારનો અવાજ સંભળાતા જ સીક્રેટ સર્વિસના એજન્ટોએ તુરંત હરકતમાં આવી તમામ મહાનુભાવોને સુરક્ષિત કવચ પૂરું પાડ્યું હતું અને તેમને કાર્યક્રમ સ્થળેથી બહાર કાઢ્યા હતા.

વડાપ્રધાન નરેન્દ્ર મોદીએ આ ઘટના અંગે ઘેરી ચિંતા વ્યક્ત કરતા સોશિયલ મીડિયા પર આકરો પ્રતિસાદ આપ્યો છે. તેમણે સ્પષ્ટ શબ્દોમાં જણાવ્યું કે લોકશાહીમાં હિંસાને કોઈ જ સ્થાન નથી અને આવા કૃત્યોની એકસૂરે નિંદા થવી જોઈએ. પીએમ મોદીએ ટ્રમ્પ પરિવાર અને અન્ય નેતાઓ સુરક્ષિત હોવા બદલ રાહત વ્યક્ત કરી તેમની કુશળતા માટે શુભેચ્છાઓ પાઠવી હતી. આ હુમલાના પ્રયાસથી વિશ્વના સૌથી જૂના લોકશાહી દેશની સુરક્ષા વ્યવસ્થા સામે ગંભીર સવાલો ઉભા થયા છે, જેણે આખા વિશ્વનું ધ્યાન ખેંચ્યું છે.

ઘટના બાદ ડોનાલ્ડ ટ્રમ્પે પુષ્ટિ કરી છે કે શૂટરની ધરપકડ કરી લેવામાં આવી છે અને સ્થિતિ હવે સંપૂર્ણ નિયંત્રણમાં છે. અમેરિકન તપાસ એજન્સીઓ હાલમાં હુમલાખોરના ઈરાદા અને આ કાવતરા પાછળના મૂળ સુધી પહોંચવા માટે તપાસ તેજ કરી રહી છે. આ ઘટનાને પગલે વોશિંગ્ટનમાં સુરક્ષા અભેદ્ય બનાવી દેવામાં આવી છે. આ ગોળીબારે માત્ર અમેરિકા જ નહીં પરંતુ સમગ્ર વિશ્વમાં સુરક્ષા એજન્સીઓની ઊંઘ ઉડાડી દીધી છે, કારણ કે આ હુમલો એક એવા સ્થળે થયો હતો જ્યાં સુરક્ષાના અનેક સ્તરો મોજૂદ હતા.