ક્વીન્સલેન્ડ:ઉનાળાના વેકેશનમાં જો તમે કંઈક એવું શોધતા હોવ જે માત્ર સુંદર જ નહીં પણ સાવ અનોખું હોય, તો ઓસ્ટ્રેલિયાનો હિલ ઇનલેટ અને વ્હાઇટહેવન બીચ તમારા માટે શ્રેષ્ઠ પસંદગી બની શકે છે. આ કોઈ સામાન્ય પર્યટન સ્થળ નથી, પણ પ્રકૃતિનો એક અદભૂત જાદુ છે. અહીંની સૌથી મોટી વિશેષતા એ છે કે સમુદ્રની ભરતી અને ઓટ રેતીને એવી રીતે ખસેડે છે કે દર છ કલાકે એક નવું લેન્ડસ્કેપ તૈયાર થાય છે. તમે સવારે જે દ્રશ્ય જોયું હોય, તે બપોરે સંપૂર્ણપણે બદલાઈ ગયું હોય છે. ફોટોગ્રાફીના શોખીનો અને શાંતિ શોધનારા પ્રવાસીઓ માટે આ સ્થળ પૃથ્વી પરના સ્વર્ગ સમાન છે.
આ સ્થળની બીજી મોટી ખાસિયત 7 કિલોમીટર લાંબો વ્હાઇટહેવન બીચ છે, જે તેની 98% શુદ્ધ સિલિકા રેતી માટે વિશ્વભરમાં પ્રખ્યાત છે. આ રેતીની વિશેષતા એ છે કે તે ગરમીને પકડી રાખતી નથી પરંતુ તેને પ્રતિબિંબિત કરે છે, પરિણામે કાળઝાળ ગરમીમાં પણ અહીંની રેતી બરફ જેવી ઠંડી લાગે છે અને પ્રવાસીઓ ખુલ્લા પગે ફરી શકે છે. આ રેતી એટલી સ્વચ્છ છે કે લોકો તેનો ઉપયોગ પોતાના દાગીના સાફ કરવા માટે પણ કરે છે. જોકે, આ એક સંરક્ષિત નેશનલ પાર્ક હોવાથી અહીં રહેવા કે ખાવા-પીવાની કોઈ હોટલ નથી, પ્રવાસીઓએ પોતાની સાથે જ બધું લઈ જવું પડે છે અથવા ટૂર ઓપરેટર દ્વારા પિકનિક લંચની વ્યવસ્થા કરવામાં આવે છે.
જો તમે ભારતથી અહીં જવાની યોજના બનાવી રહ્યા હોવ, તો જૂનથી ઓક્ટોબરનો સમય સૌથી ઉત્તમ છે. દિલ્હીથી સિડની કે મેલબોર્ન પહોંચ્યા બાદ ડોમેસ્ટિક ફ્લાઇટ દ્વારા પ્રોસર્પાઈન એરપોર્ટ જઈ શકાય છે, જ્યાંથી સીપ્લેન, બોટ કે હેલિકોપ્ટર દ્વારા આ જાદુઈ બીચ સુધી પહોંચાય છે. એક ખાસ વાતનું ધ્યાન રાખવું જરૂરી છે કે અહીં ધૂમ્રપાન અને કચરો ફેંકવા પર સખત પ્રતિબંધ છે અને નિયમોના ઉલ્લંઘન બદલ મોટો દંડ થઈ શકે છે. ઉપરાંત, નવેમ્બરથી મે મહિના દરમિયાન દરિયામાં ઝેરી જેલીફિશ (સ્ટિંગર) હોવાથી પાણીમાં ઉતરતી વખતે ખાસ પોશાક પહેરવો અનિવાર્ય છે. વિઝા માટે ઓછામાં ઓછા એક મહિના પહેલા અરજી કરવી હિતાવહ છે.