ન્યૂયોર્ક, તા.૩૦: અમેરિકામાં ઉચ્ચ શિક્ષણ મેળવીને ત્યાં જ સ્થાયી થવાનું અને વૈશ્વિક કંપનીઓમાં નોકરી કરવાનું સપનું જોતા આંતરરાષ્ટ્રીય સ્નાતકો, ખાસ કરીને ભારતીય વિદ્યાર્થીઓ માટે ચિંતાજનક અહેવાલ સામે આવ્યા છે. યુએસ (US) ની કંપનીઓ હવે વિદેશી કામદારોને નોકરી પર રાખવા અથવા તેમના વિઝા સ્પોન્સર કરવા માટે અગાઉ જેટલી ઉત્સુક રહી નથી. રાષ્ટ્રપતિ ડોનાલ્ડ ટ્રમ્પના નેતૃત્વ હેઠળ ઇમિગ્રેશનના નિયમોમાં કરવામાં આવેલા કડક ફેરફારોને કારણે અમેરિકાના કોર્પોરેટ સેક્ટરમાં ભરતીની નીતિઓ ઝડપથી બદલાઈ રહી છે.

સર્વેના ચોંકાવનારા આંકડા: વિદેશી સ્નાતકોની માંગ તળિયે

‘ગ્રેજ્યુએટ મેનેજમેન્ટ એડમિશન કાઉન્સિલ’ દ્વારા તાજેતરમાં કોર્પોરેટ ભરતી કરનારાઓ (Recruiters) નો એક વ્યાપક સર્વે કરવામાં આવ્યો હતો. આ સર્વેક્ષણ મુજબ:

·         વર્ષ ૨૦૨૨ માં ૫૫% અમેરિકન કંપનીઓ વિદેશી બિઝનેસ સ્કૂલના સ્નાતકોને રાખવા માટે તૈયાર હતી.

·         ગયા વર્ષે આ આંકડો ઘટીને ૩૩% થયો હતો.

·         વર્તમાન વર્ષ ૨૦૨૬ માં તે વધુ ઘટીને માત્ર ૨૯% એ પહોંચી ગયો છે.

વિઝા પાછળનો જંગી ખર્ચ અને કડક ચકાસણી

JPMorgan Chase, Amazon, Apple અને Microsoft જેવી વિશ્વની અગ્રણી કંપનીઓ લાંબા સમયથી પ્રતિભાશાળી વિદેશી મૂળના વ્યાવસાયિકો માટે મોટી રકમ ચૂકવીને ઇમિગ્રેશન વકીલો અને વિઝા મેળવતી આવી છે. ઇમિગ્રેશન એટર્નીના જણાવ્યા અનુસાર, માત્ર ત્રણ વર્ષના વર્ક વિઝા માટેની કાનૂની અને સરકારી પ્રક્રિયાઓનો ખર્ચ જ લગભગ $૮,૦૦૦ (આશરે ₹૬.૬ લાખથી વધુ) થી શરૂ થાય છે.

પરંતુ, ટ્રમ્પ વહીવટીતંત્રે ગયા વર્ષે નવા વિઝા અરજદારો માટે ચકાસણી પ્રક્રિયા (Screening) ખૂબ જ કડક બનાવી દીધી છે. લોકપ્રિય H1-B વિઝા માટે હવે એવી નવી પસંદગી પ્રક્રિયા રજૂ કરવામાં આવી છે, જે વધુ કમાણી કરનારા અને અતિ-વિશિષ્ટ કામદારોની તરફેણ કરે છે. આ બદલાતી ફેડરલ નીતિઓના કારણે કંપનીઓ હવે ભારે મૂંઝવણમાં મુકાઈ છે. યુએસ સિટિઝનશિપ એન્ડ ઇમિગ્રેશન સર્વિસીસના ડેટા અનુસાર, ગયા નાણાકીય વર્ષમાં H1-B વિઝા ફાઇલ કરનારા નોકરીદાતાઓની સંખ્યામાં ૪૦% નો મોટો ઘટાડો નોંધાયો છે.

વોલમાર્ટ જેવી મોટી બ્રાન્ડે લીધો કડક નિર્ણય

અમેરિકાની સૌથી મોટી ખાનગી નોકરીદાતા કંપની વોલમાર્ટ ઇન્ક. (Walmart) એ તાજેતરમાં એવા તમામ ઉમેદવારોને કોર્પોરેટ ઓફિસની નોકરીઓ આપવાનું બંધ કરી દીધું છે જેમને H1-B વિઝા માટે સ્પોન્સરશિપની જરૂર હોય. કંપનીના પ્રવક્તાએ સ્પષ્ટ કર્યું હતું કે તેઓ સ્થાનિક સ્તરે ઉપલબ્ધ શ્રેષ્ઠ પ્રતિભાઓ પર વધુ ધ્યાન કેન્દ્રિત કરી રહ્યા છે.

ઓફશોરિંગ અને ભારત તરફ નજર

અમેરિકામાં વધી રહેલા આ અવરોધોને કારણે ૬૮% કંપનીઓ હવે પોતાની આંતરરાષ્ટ્રીય ભરતીઓને અમેરિકા લાવવાને બદલે ‘ઓફશોર’ (વિદેશી ઓફિસોમાંથી ઓપરેટ) કરવા માટે મજબૂર બની છે. નિષ્ણાતોના મતે, આ પ્રતિભાઓને અમેરિકામાં રાખવાના બદલે કંપનીઓ તેમની લેટિન અમેરિકા અથવા ભારત ખાતે આવેલી આંતરરાષ્ટ્રીય ઓફિસોમાં જ નિયુક્ત કરી રહી છે.

ઇમિગ્રેશન વકીલોનું માનવું છે કે વૈશ્વિક અર્થતંત્રમાં આગળ વધવા માટે કંપનીઓને આ પ્રતિભાઓની જરૂર છે જ, પરંતુ યુએસ સરકારના આ કડક વલણને કારણે વ્યવસાયો માટે પ્રગતિના અવરોધો ઊભા થઈ રહ્યા છે.