મુંબઈ: હિન્દી ટેલિવિઝનના ઇતિહાસમાં બી.આર. ચોપરાની 'મહાભારત' એક એવો શો છે જેણે દરેક પેઢીના મન પર ઊંડી છાપ છોડી છે. આજે પણ આ શોના પાત્રો અને તેની ભવ્યતા લોકોમાં ચર્ચાનો વિષય છે. જોકે, આ આઈકોનિક શો સાથે જોડાયેલી એક એવી રસપ્રદ વાત સામે આવી છે જે જાણીને તમને નવાઈ લાગશે. શું તમે જાણો છો કે, આ શોમાં 'દ્રૌપદી'નું અમર પાત્ર ભજવનારી રૂપા ગાંગુલી આ ભૂમિકા માટે નિર્માતાઓની પ્રથમ પસંદગી નહોતી?
જુહી ચાવલાને મળી હતી દ્રૌપદીની ભૂમિકા?
મીડિયા રિપોર્ટ્સ અને રવિ ચોપરાના પત્ની રેણુ ચોપરાના ખુલાસા મુજબ, દ્રૌપદીના પાત્ર માટે શરૂઆતમાં બોલિવૂડની લોકપ્રિય અભિનેત્રી જુહી ચાવલાને સાઇન કરવામાં આવી હતી. પરંતુ કોઈ કારણોસર જુહી ચાવલા આ શોનો ભાગ બની શકી નહીં. ત્યારબાદ આ ભૂમિકા રૂપા ગાંગુલીને મળી, જેમણે આ પાત્રમાં પોતાના અભિનયથી જીવંતતા લાવી દીધી અને આજે પણ લોકો તેમને દ્રૌપદી તરીકે જ યાદ કરે છે.
આર્થિક મુશ્કેલીઓ છતાં ડગ્યા નહીં બી.આર. ચોપરા
રેણુ ચોપરાએ એક જૂના ઇન્ટરવ્યુમાં જણાવ્યું હતું કે મહાભારતનું નિર્માણ તે સમયે અત્યંત ખર્ચાળ હતું. પહેલા એપિસોડમાં જ 7-8 લાખ રૂપિયાનો ખર્ચ થતો હતો, જ્યારે ફાઇનાન્સર્સ માત્ર 6 લાખ રૂપિયા આપવા તૈયાર હતા. રવિ ચોપરા આર્થિક તંગીથી ખૂબ જ પરેશાન હતા, પરંતુ બી.આર. ચોપરાનો આત્મવિશ્વાસ અદભૂત હતો. તેમણે રવિને સલાહ આપી હતી કે, "પૈસાની ચિંતા ન કરો, તમે જે બનાવી રહ્યા છો તે તમારા દિલથી બનાવો, સફળતા ચોક્કસ મળશે."
ઐતિહાસિક સફળતાની ગાથા
બી.આર. ચોપરાની આ દૂરંદેશી અને સમર્પણ જ હતું કે જેણે મહાભારતને ભારતીય ટેલિવિઝનનો સૌથી લોકપ્રિય શો બનાવી દીધો. આજે પણ રૂપા ગાંગુલીનો અભિનય અને શોના દરેક પાત્રની પસંદગી એક અનોખું ઉદાહરણ માનવામાં આવે છે. ભલે દ્રૌપદી તરીકે જુહી ચાવલાના નામની ચર્ચા થઈ હોય, પરંતુ રૂપા ગાંગુલીના પાત્રાલેખને આ શોને એક નવી ઊંચાઈ પર પહોંચાડવામાં મદદ કરી હતી.