નવી દિલ્હી, તા.૧૧: અત્યારના સૌથી મોટા વૈશ્વિક સમૂહ મંચ ગણાતી ૧૮મી બ્રિક્સ (BRICS) સમિટના આયોજન માટે ભારત સંપૂર્ણપણે સજ્જ થઈ ગયું છે. ભારત પાસે વર્ષ ૨૦૨૬ માટે બ્રિક્સનું અધ્યક્ષપદ છે, અને ૧૨ સપ્ટેમ્બરથી નવી દિલ્હીમાં યોજાનારી આ ઐતિહાસિક શિખર પરિષદનું સૌથી મોટું આકર્ષણ ચીનના રાષ્ટ્રપતિ શી જિનપિંગ બનવાના છે. છેલ્લા સાત વર્ષમાં ભારતની આ તેમની પ્રથમ મુલાકાત હશે, જેમાં તેમની સાથે ૬૭ અધિકારીઓનું એક હાઈ-પ્રોફાઈલ પ્રતિનિધિમંડળ પણ આવી રહ્યું છે. આ મોટા કાફલામાં સૌથી મોટું નામ ચીનની કમ્યુનિસ્ટ પાર્ટી (CPC)ના સર્વોચ્ચ નેતા અને શી જિનપિંગના પડછાયા સમાન ગણાતા તેમના ખાસ વિશ્વાસુ 'કાઈ ચી'નું છે, જેઓ ચીનના રાજકીય માળખામાં બીજા નંબરની સૌથી તાકતવર વ્યક્તિ માનવામાં આવે છે.

સિત્તેર વર્ષીય કાઈ ચી ચીનની સૌથી શક્તિશાળી નિર્ણય લેતી સંસ્થા એવી સાત સભ્યોની પોલિટબ્યુરો સ્ટેન્ડિંગ કમિટીમાં પાંચમા ક્રમના સભ્ય છે. ફુજિયન પ્રાંતમાં જન્મેલા કાઈનો શી જિનપિંગ સાથેનો રાજકીય સંબંધ દાયકાઓ જૂનો છે, કારણ કે બંનેએ અગાઉ ફુજિયન અને ઝેજિયાંગમાં સાથે મળીને લાંબો સમય કામ કર્યું હતું. આ ગાઢ મિત્રતા અને વફાદારીના કારણે જ પાર્ટીમાં કાઈની પ્રગતિ ખૂબ જ ઝડપથી થઈ છે. તેમણે ૨૦૨૨ની બેઇજિંગ વિન્ટર ઓલિમ્પિક્સની તૈયારીઓનું સફળ નેતૃત્વ કરીને પોતાની પ્રશાસકીય કુશળતા પૂરવાર કરી હતી. આજે તેઓ સીપીસી સેન્ટ્રલ સચિવાલયનું નેતૃત્વ સંભાળી રહ્યા છે અને પાર્ટીના આંતરિક કામકાજની તમામ દેખરેખ રાખે છે.

આગામી બ્રિક્સ સમિટ દરમિયાન કાઈ ચી માત્ર એક સાથી તરીકે નહીં, પરંતુ શી જિનપિંગની નીતિઓને જમીની સ્તરે અમલમાં મૂકનારા મુખ્ય માસ્ટરમાઇન્ડ તરીકે દિલ્હી આવશે. હાલના ભૌગોલિક-રાજકીય સમીકરણો વચ્ચે ભારત અને ચીન વચ્ચેના રાજદ્વારી સંબંધો, દ્વિપક્ષીય વેપાર અને પ્રાદેશિક સુરક્ષા જેવા સંવેદનશીલ મુદ્દાઓ પર આ ઉચ્ચ-સ્તરીય મુલાકાતની ભારે અસર પડી શકે છે. શી જિનપિંગના આ 'રાઈટ-હેન્ડ મેન' ની દિલ્હી પધરામણી એ વાતની સાક્ષી પૂરે છે કે ચીન આ બેઠકને કેટલું ગંભીરતાથી લઈ રહ્યું છે, જેના પર સમગ્ર વિશ્વના રાજકીય અક્ષાંશોની નજર મંડાયેલી છે.