ગ્રેટર નોઈડા, તા.૧૩: ઉત્તર પ્રદેશના યમુના એક્સપ્રેસવે પર ટ્રાફિક નિયમોના અમલીકરણ દરમિયાન ઓટોમેટિક કેમેરાની અત્યંત વિચિત્ર અને આશ્ચર્યજનક ભૂલ સામે આવી છે, જ્યાં નિર્ધારિત ૧૦૦ કિલોમીટરની મર્યાદા સામે માત્ર ૧ કિમી પ્રતિ કલાક વધુ ઝડપે વાહન ચલાવવા બદલ એક કાર માલિકને તાજેતરમાં ૨૦૦૦ રૂપિયાનો મોટો દંડ ફટકારવામાં આવ્યો છે.

આ અનોખા મામલાનો ખુલાસો કરતા વાહનચાલકે સોશિયલ મીડિયા પર ઈ-ચલણનો સ્ક્રીનશોટ શેર કર્યો હતો, જેમાં જણાવવામાં આવ્યું હતું કે જ્યારે તેમની કાર ૧૦૧ કિમી પ્રતિ કલાકની ગતિએ દોડી રહી હતી ત્યારે હાઇટેક કેમેરા દ્વારા તેને નિયમભંગ ગણીને તુરંત જ દંડની નોટિસ જારી કરવામાં આવી હતી.

માત્ર ગતિ મર્યાદા જ નહીં પરંતુ ચલણમાં દર્શાવવામાં આવેલા તકનીકી ડેટા પર પણ ગંભીર સવાલો ઉભા થયા છે, કારણ કે સ્પીડ ગન દ્વારા વાહનનું જીપીએસ લોકેશન એટલાન્ટિક મહાસાગરના મધ્ય ભાગમાં એટલે કે '૦ ડિગ્રી ઉત્તર અને ૦ ડિગ્રી પૂર્વ' તરીકે રેકોર્ડ કરવામાં આવ્યું હતું.

સોશિયલ મીડિયા પર આ પોસ્ટ વાયરલ થયા બાદ ટ્રાફિક પોલીસ વિભાગ દ્વારા તાત્કાલિક પ્રતિક્રિયા આપવામાં આવી છે અને નોઈડા ટ્રાફિક પોલીસે કાર માલિકને હેલ્પલાઈન નંબર ૭૦૬૫૦૬૦૮૮૨ પર સંપર્ક કરીને સત્તાવાર સમીક્ષા કરાવવા માટે સલાહ આપી છે.

આ ઘટના સામે આવ્યા બાદ દેશભરમાં ઓટોમેટિક ટ્રાફિક એન્ફોર્સમેન્ટ અને એઆઈ આધારિત કેમેરાની ચોકસાઈ સામે સોશિયલ મીડિયા વપરાશકર્તાઓ અને વાહનચાલકો દ્વારા ભારે ચર્ચા શરૂ કરવામાં આવી છે કે નજીવી ગતિ વધારા માટે આટલી મોટી રકમનો દંડ યોગ્ય નથી.

હાલમાં કાર માલિક દ્વારા જારી કરાયેલા ચલણની સત્તાવાર સમીક્ષા કરવા અને સિસ્ટમની તકનીકી ખામીઓને સુધારવા માટે માંગ કરવામાં આવી છે, ત્યારે આ ઘટનાએ સ્માર્ટ હાઇવે પર લાગુ કરાયેલી ડિજિટલ ટ્રાફિક વ્યવસ્થાઓની પારદર્શિતા સામે મોટા પ્રશ્નાર્થ ચિહ્નો ખડા કર્યા છે.