કોલકાતા : પશ્ચિમ બંગાળ વિધાનસભા ચૂંટણીના પરિણામોમાં ઉત્તર પ્રદેશના મુખ્યમંત્રી યોગી આદિત્યનાથ ભાજપ માટે સૌથી મોટા 'ગેમ ચેન્જર' સાબિત થયા છે. ચૂંટણી પંચના ડેટા મુજબ, યોગી આદિત્યનાથે બંગાળમાં જે ૩૫ બેઠકો પર રેલીઓ અને રોડ-શો કર્યા હતા, તેમાંથી ૩૧ બેઠકો પર ભાજપના ઉમેદવારોએ જીત મેળવી છે. ૮૮.૫ ટકાનો આ પ્રચંડ સ્ટ્રાઈક રેટ દર્શાવે છે કે બંગાળની જનતા પર યોગીની છબી અને તેમના શાસન મોડેલની ઊંડી અસર પડી છે.
ભ્રષ્ટાચાર અને કાયદો-વ્યવસ્થા પર આકરા પ્રહારો
ચૂંટણી પ્રચાર દરમિયાન યોગી આદિત્યનાથે મમતા બેનર્જી સરકાર પર આકરા પ્રહારો કર્યા હતા. તેમણે બંગાળમાં ચાલતા રેતી માફિયા, કોલસા માફિયા અને પશુ તસ્કરીના નેટવર્કને ખુલ્લું પાડ્યું હતું. યોગી એ વારંવાર ઉત્તર પ્રદેશના 'બુલડોઝર મોડેલ'નો ઉલ્લેખ કરીને ખાતરી આપી હતી કે જો ભાજપ સત્તા પર આવશે તો બંગાળમાં પણ ગુંડાગીરી અને 'કટ મની'ની પ્રથા બંધ કરવામાં આવશે. આ સંદેશને કારણે ખાસ કરીને સરહદી અને ગ્રામીણ વિસ્તારોમાં ભાજપને મોટી સફળતા મળી છે.
ઐતિહાસિક વારસાને જોડવામાં સફળતા
યોગી આદિત્યનાથે માત્ર રાજકીય નહીં, પણ સાંસ્કૃતિક મુદ્દાઓને પણ સ્પર્શ્યા હતા. તેમણે બંગાળના ભવ્ય વારસા, આધ્યાત્મિકતા અને રાષ્ટ્રવાદમાં બંગાળના ફાળાને યાદ અપાવીને મતદારોને ભાવનાત્મક રીતે જોડ્યા હતા. તેમણે ૧૯૦૫ના બંગ ભંગ આંદોલન અને સ્વદેશી ચળવળનો ઉલ્લેખ કરી લોકોને એકતાનો સંદેશ આપ્યો હતો. નંદીગ્રામ, કાન્થી ઉત્તર-દક્ષિણ, જલપાઈગુડી અને કૂચ બિહાર જેવી હાઈ-પ્રોફાઈલ બેઠકો પર યોગીના પ્રચારે ભાજપની જીત નિશ્ચિત કરી હતી.
૨૦૨૭ ની યુપી ચૂંટણી માટે મજબૂત સંકેત
બંગાળમાં યોગી આદિત્યનાથની આ સફળતાએ તેમને ભાજપના સૌથી કદાવર રાષ્ટ્રીય પ્રચારક તરીકે સ્થાપિત કર્યા છે. પક્ષના સૂત્રોના જણાવ્યા અનુસાર, દેશભરમાંથી યોગીની સભાઓ માટે સૌથી વધુ માંગ રહે છે. બંગાળમાં મળેલા આ જનાદેશથી આગામી ૨૦૨૭ની ઉત્તર પ્રદેશ વિધાનસભા ચૂંટણી માટે પણ ભાજપનો આત્મવિશ્વાસ વધ્યો છે. જોકે, બોલપુર અને કેશપુર જેવી ૪ બેઠકો પર યોગીના પ્રચાર છતાં ભાજપને હારનો સામનો કરવો પડ્યો હતો, પરંતુ એકંદરે તેમનું પ્રદર્શન અભૂતપૂર્વ રહ્યું છે.