પેરિસ, તા. ૩૧:  બી.એ.પી.એસ.ના આધ્યાત્મિક વડા પરમ પૂજ્ય મહંત સ્વામી મહારાજ પેરિસ પહોંચ્યા છે. તેઓ ૨થી ૧૪ સપ્ટેમ્બર દરમિયાન યોજાનારા ‘સંસ્કૃતિ મહોત્સવ’ અને ૬ સપ્ટેમ્બરે નિર્ધારિત સ્વામિનારાયણ હિંદુ મંદિરની મૂર્તિ-પ્રતિષ્ઠા તથા સમર્પણ સમારોહમાં ઉપસ્થિત રહેશે. સત્તાવાર વિગતો પ્રમાણે આ ફ્રાન્સનું પ્રથમ પરંપરાગત રીતે રચાયેલું અને ખાસ હેતુથી નિર્મિત પથ્થરનું હિંદુ મંદિર છે.

બી.એ.પી.એસ. સ્વામિનારાયણ સંસ્થાના આધ્યાત્મિક વડા પરમ પૂજ્ય મહંત સ્વામી મહારાજનું ફ્રાન્સની રાજધાની પેરિસમાં ભાવભર્યું આગમન થયું છે. સ્વામીશ્રી ૨૯ ઓગસ્ટે સ્થાનિક સમય પ્રમાણે સાંજે ૫.૦૬ વાગ્યે પેરિસના લે બૂર્ઝે વિમાનમથક ઉપર આવી પહોંચ્યા હતા. ત્યાંથી તેઓ બુસી-સેં-જ્યોર્જ ખાતે નિર્મિત સ્વામિનારાયણ હિંદુ મંદિર તરફ રવાના થયા હતા. પેરિસમાં ભક્તો અને શુભેચ્છકોએ સ્વામીશ્રીનાં દર્શન કરી તેમનું ભાવપૂર્વક સ્વાગત કર્યું હતું.

સ્વામીશ્રી ૧૬ સપ્ટેમ્બર સુધી પેરિસમાં રોકાશે અને મંદિરના ઐતિહાસિક ઉદ્ઘાટન પ્રસંગે યોજાનારા ધાર્મિક, આધ્યાત્મિક, સામાજિક તથા સાંસ્કૃતિક કાર્યક્રમોને આશીર્વાદ આપશે. મહંત સ્વામી મહારાજે પોતાના યુરોપ પ્રવાસને ગુરુ યોગીજી મહારાજ પ્રત્યેની ભક્તિપૂર્ણ અંજલિરૂપે ‘યોગી અંજલિ યાત્રા’ નામ આપ્યું છે.

પેરિસના પૂર્વીય ઉપનગર બુસી-સેં-જ્યોર્જમાં તૈયાર થયેલું આ મંદિર ફ્રાન્સનું પ્રથમ પરંપરાગત શૈલીમાં રચાયેલું અને હેતુપૂર્વક નિર્મિત પથ્થરનું હિંદુ મંદિર હોવાનું સંસ્થાએ જણાવ્યું છે. તસવીરમાં કરવામાં આવેલા ‘ફ્રાન્સનું પ્રથમ હિંદુ મંદિર’ એવા દાવાને આટલી સ્પષ્ટતા સાથે સમજવો જરૂરી છે, કારણ કે ફ્રાન્સમાં અન્ય હિંદુ ઉપાસના સળો અ પણગાઉથી કાર્યરત છે.

આ મંદિરની પરિકલ્પનાની યાત્રા ૫૬ વર્ષ પહેલાં શરૂ થઈ હતી. વર્ષ ૧૯૭૦માં યોગીજી મહારાજ પેરિસના ઓર્લી વિમાનમથકે રોકાયા ત્યારે તેમણે ફ્રાન્સમાં એક આધ્યાત્મિક કેન્દ્રની પ્રાર્થના કરી હતી. ત્યારબાદ પ્રમુખસ્વામી મહારાજે યુરોપના સત્સંગ સમુદાયને સતત માર્ગદર્શન આપી મંદિરના સ્વપ્નને આગળ વધાર્યું હતું. મહંત સ્વામી મહારાજના માર્ગદર્શન હેઠળ હવે આ સંકલ્પ સાકાર થઈ રહ્યો છે.

મંદિરનો ભૂમિપૂજન સમારોહ ૧૯ ઓક્ટોબર, ૨૦૨૧ના રોજ અને શિલાન્યાસ મહોત્સવ ૩ તથા ૪ સપ્ટેમ્બર, ૨૦૨૨ના રોજ યોજાયો હતો. જૂન, ૨૦૨૪માં પાયાનું બાંધકામ શરૂ થયું હતું. ભારતમાં પસંદ કરીને કોતરવામાં આવેલા કુદરતી પથ્થરોને ફ્રાન્સ પહોંચાડવામાં આવ્યા અને ભારતીય કારીગરોએ ફ્રેન્ચ સ્થાપત્યવિદો, પથ્થર નિષ્ણાતો તથા ઇજનેરો સાથે મળીને તેનું નિર્માણ કર્યું છે. આ મંદિર ભારતીય શિલ્પકળા અને ફ્રાન્સની આધુનિક ઇજનેરી કુશળતાના સંગમનું પ્રતીક બન્યું છે.

પરંપરાગત હિંદુ સ્થાપત્ય મુજબ તૈયાર થયેલા મંદિરમાં ૪ છત્રીઓ, ૫ શિખરો, ૧૦ ઘુમ્મટ, ૧૫ સ્તંભ અને ૭૩ કલાત્મક ગવાક્ષ છે. મંદિરમાં અક્ષર-પુરુષોત્તમ મહારાજ ઉપરાંત રાધા-કૃષ્ણ ભગવાન, સીયાવર રામચંદ્ર ભગવાન, ઉમાપતિ શંકર ભગવાન, હનુમાનજી અને ગણેશજી સહિતનાં દેવી-દેવતાઓની મૂર્તિઓની સ્થાપના કરવામાં આવશે. મંદિર તમામ ધર્મ, સમાજ અને પૃષ્ઠભૂમિના લોકો માટે ખુલ્લું રહેશે તથા ઉપાસના, શિક્ષણ, સંસ્કૃતિ, સેવા અને સામાજિક સુમેળના કેન્દ્ર તરીકે કાર્ય કરશે.

મંદિરના ઉદ્ઘાટન નિમિત્તે ૨થી ૧૪ સપ્ટેમ્બર સુધી ૧૩ દિવસનો ‘સંસ્કૃતિ મહોત્સવ’ યોજાશે. ૨ સપ્ટેમ્બરે વૈદિક મહાયજ્ઞનો પ્રારંભ થશે અને મહિલાઓ માટે પાલખીયાત્રા યોજાશે. ૩ સપ્ટેમ્બરે પેરિસની સેન નદીમાં જળયાત્રા, મહિલા ભક્તિયાત્રા અને સ્વાગત સભા યોજાશે. ૪ સપ્ટેમ્બરે શ્રીકૃષ્ણ જન્માષ્ટમીનો ઉત્સવ ઊજવાશે.

૫ સપ્ટેમ્બરે ભવ્ય નગરયાત્રાનું આયોજન કરવામાં આવ્યું છે. તેમાં ભારતીય સંસ્કૃતિની વિવિધતા, શાંતિ, સેવા અને સામાજિક સંવાદિતાનો સંદેશ રજૂ કરવામાં આવશે. આ જ દિવસે પેરિસના સત્સંગ ઇતિહાસને રજૂ કરતો સાંસ્કૃતિક કાર્યક્રમ પણ યોજાશે.

૬ સપ્ટેમ્બરે મહંત સ્વામી મહારાજની ઉપસ્થિતિમાં મંદિરમાં વૈદિક વિધિ સાથે મૂર્તિ-પ્રતિષ્ઠા કરવામાં આવશે. સાંજે મંદિર સમર્પણ સભા યોજાશે. આ પ્રસંગ સાથે મંદિર ઔપચારિક રીતે ઉપાસના અને દર્શન માટે સમર્પિત થશે.

૭ સપ્ટેમ્બરે મહિલા સંમેલન, ૮ સપ્ટેમ્બરે કીર્તન આરાધના, ૯ સપ્ટેમ્બરે કૃતજ્ઞતા સભા, ૧૦ સપ્ટેમ્બરે સત્સંગ સભા, ૧૧ સપ્ટેમ્બરે સ્વયંસેવક સભા અને ૧૨ સપ્ટેમ્બરે યુરોપ સત્સંગ શિખર સંમેલન યોજાશે. 

૧૩ સપ્ટેમ્બરે સમુદાય યાત્રા, વૈદિક મહાયજ્ઞની પૂર્ણાહુતિ અને મહંત સ્વામી મહારાજની જન્મજયંતીની ઉજવણી થશે. 

૧૪ સપ્ટેમ્બરે હિંદુ સાંસ્કૃતિક મહોત્સવ સાથે કાર્યક્રમોની પૂર્ણાહુતિ થશે.

આ મંદિર ફ્રાન્સમાં વસતા હિંદુ પરિવારો માટે માત્ર ઉપાસનાસ્થળ નહીં, પરંતુ નવી પેઢીને ભારતીય સંસ્કાર, પરંપરા અને આધ્યાત્મિક મૂલ્યો સાથે જોડતું કેન્દ્ર બનશે. 

મંદિરના નિર્માણ અને મહોત્સવની તૈયારીઓમાં ફ્રાન્સ, યુરોપ, બ્રિટન અને ભારતના સંતો, કારીગરો તથા સ્વયંસેવકો જોડાયા છે. પેરિસની બહુસાંસ્કૃતિક ઓળખમાં આ મંદિર શ્રદ્ધા, સેવા અને આંતરધર્મીય સંવાદિતાના નવા પ્રતીક તરીકે સ્થાન મેળવશે.